Në përvjetorin e katërt të dhunës në kuvend më 27 prill, BDI bën thirrje te të gjitha partitë politike që të zotohen që 27 prilli të mos ndodh asnjëherë.
“BDI dënon gjuhën e urrejtjes e cila u dëgjua gjatë protestës së organizuar të dielën në mbrojtje të personave të akuzuar dhe të dënuar për ngjarjet e 27 prillit të vitit 2017 në Kuvend. Paraqitja e mendësisë së para vitit 2001 nuk i ka hije një shoqërie multietnike dhe një shteti siç është Republika e Maqedonisë së Veriut pasi që ajo dëmton vazhdimin e ndërtimit të mirëbesimit mes popujve tonë”, thuhet në njoftimin e BDI-së.
Nga BDI shtojnë se njëra nga pjesëmarrëset në këtë protestë gjatë fjalimit të saj para të pranishmëve tha se për të është e papranueshme që të dënuarit e 27 prillit të vazhdojnë të mbeten prapa grilave kurse siç potencoi ajo, terroristët e vitit 2001 të udhëheqin me pushtetin.
“Gjithashtu po e njëjta pjesëmarrëse ka thënë se personat që terrorizuan kuvendin me 27 Prill të vitit 2017 janë patriot, atdhedashës dhe patjetër që ata duhet të mos trajtohen njëjtë sikur dhe terroristët e vitit 2001”, thuhet në njoftimin e BDI-së.
Sipas tyre, këto ide arkaike dhe regresive duhet të dënohen nga të gjithë pjesëmarrësit e protestës dhe të distancohen që të mos identifikohen me të njëjtat.
