“Bullgaria duhet të ketë një politikë të qëndrueshme ndaj Republikës së Maqedonisë së Veriut dhe të investojë forca dhe burime në zbatimin dhe zhvillimin e saj”, tha Ivajlo Valçev, eurodeputet nga grupi i Konservatorëve dhe Reformistëve Evropianë dhe anëtar i partisë “Ka një Popull të Tillë”. Sipas tij, Maqedonia është përpara Bullgarisë në këtë drejtim.
Më 4 qershor, Komiteti i Punëve të Jashtme i Parlamentit Evropian ra dakord të shtyjë votimin për raportin mbi progresin e Maqedonisë drejt BE-së me propozim të raportuesit Thomas Weitz. Votimi në komisionin parlamentar është planifikuar për 24 qershor, ndërsa në sallën plenare të Parlamentit Evropian (PE) në Strasburg në korrik.
Valçev beson se mungon linja e një politike të madhe kombëtare dhe një nga qëllimet e tij personale do të jetë që Bullgaria të fillojë të zbatojë mënyrën e vet të veprimit në vitet e ardhshme, në mënyrë që të gjitha politikat bullgare të jenë të qarta dhe të komunikuara.
“Lobi i Maqedonisë në PE është i fortë dhe i pamaskuar, ndërsa Bullgaria nuk ka nevojë fare për një lobi, pasi është një shtet anëtar i BE-së”, theksoi Valçev.
“Ndoshta, të gjithë të tjerët duhet të qëndrojnë në anën e një shteti anëtar dhe të ndajnë qëndrimin e tij, sepse në fund të fundit, qëndrimet e Bullgarisë janë qëndrime të BE-së. Në muajt e fundit, ne mund të kemi qenë shumë të qetë, shumë të butë dhe shumë diplomatikë, ndërsa ndoshta nuk u kemi treguar partnerëve tanë evropianë se presim të shohim mbështetje shumë më të fortë”, tha eurodeputeti.
