Kryetari i Komisionit për Çështje Evropiane i Kuvendit të Republikës së Maqedonisë, z. Artan Grubi, e filloi vizitën e tij në SHBA me takim në Uashington me kongresmenët, Dejvid Prajs dhe Pit Viskloski.
Kongresmeni Prajs është bashkëkryesues i Partneritetit për Demokraci të Kongresit Amerikan ku ndërtohen qëndrime mbipartiake dhe politike ndërmjet republikanëve dhe demokratëve.
Grubi foli për nevojën për shfrytëzimin e përvojës së Partneritetit për Demokraci të Kongresit Amerikan për ndërtimin e qëndrimeve mbipartiake në Kuvendin tonë, rreth integrimit të vendit në NATO dhe Bashkimin Evropian dhe reformat sistemore.
Grubi, gjithashtu, e informoi bashkëfolësin për rrjedhën e reformave në vend, si dhe për negociatat për kontestin me emrin me fqinjin tonë jugor, me ç’rast e kërkoi mbështetjen e SHBA-së për arritjen e zgjidhjes së pranueshme reciprokisht.
Paraprakisht, në Dhomën e Grupit të Miqve të Kenedisë, në Senat, Grubi mori pjesë në forumin e rregullt për gjeopolitikë të Ballkanit ku morën pjesë senatori Xhejms Inhof, dhe kongresmenët Robert Aderholt, Robert Pitenger, si dhe shumë mysafirë të lartë.
Grubi, gjithashtu, u takua edhe me Jan Suroqak, drejtor i IRI-t për Evropë dhe Poll Mekarti, zëvendësdrejtor, prej të cilëve kërkoi t’i intensifikojnë programet e tyre në Maqedoni, posaçërisht në drejtim të ndërtimit të konsensusit reformues, si dhe ngritjes së kapacitetit demokratik në institucionet dhe besimin e tyre te qytetarët.
