Në Kuvendin grek para orës 10 sipas orës lokale filloi pjesa e tretë pas kërkesës së dorëzuar nga Demokracia e Re për votimin e mosbesimit ndaj Qeverisë. Marrëveshja me Maqedoninë është në fokus të debatit të deputetëve grekë.
Siç raportoi korrespondentja e MIA-s nga Athina, debati pritet të arrijë kulmin me fjalimet e liderëve të partive politike dhe kryeministrit grek, ndërsa do të përfundojë me votimin e mosbesimit.
Sipas qëndrimeve të shprehura deri më tani, nuk priten surpriza. Deputetët e SYRIZA-s dhe Grekët e Pavarur do të votojnë kundër propozimit të Demokracisë së re, ndërsa Qeveria nuk do të fitojë mosbesim.
Debati i djeshëm maratonik, i cili zgjati më shumë se 16 orë, u kthye në një diskutim të ashpër dhe akuza të ndërsjella midis Qeverisë dhe opozitës në lidhje me marrëveshjen me Maqedoninë.
Partitë e opozitës akuzuan se marrëveshja është e keqe, ndërsa theksin e vendosin në gjuhën maqedonase dhe nënshtetësinë maqedonase, ndërsa deputetët dhe ministrat e SYRIZA-s qeverisëse me argumente i bindnin kolegët e tyre nga partitë e tjera se marrëveshja është në kuadër të vijës kombëtare greke, e dobishme dhe i mbron interesat e vendit.
Interes të veçantë paraqesin informacionet në mediat greke se në kohën e debatit të sotëm ministri i Punëve të Jashtme, Nikos Koxias do të sjellë dokumente nga MPJ greke, që kanë të bëjnë me negociatat për emrin në të kaluarën.
Paralelisht me seancën në Kuvend, siç raportoi dje korrespondentja e MIA-s nga Athina, para ndërtesës së Kuvendit, do të mbahet protestë e re në orën 16 nga organizata të cilat "nuk e japin" dhe "e mbrojnë" emrin Maqedoni.
