Tenori me famë botërore, Ramë Lahaj, pas koncertit të mbajtur mbrëmë në Prishtinë, sot ka bërë një postim emocional në Facebook.
Ai ka shprehur dashurinë e tij për kombin dhe krenarinë që i përket shqiptarëve.
“Ju dua, qysh e do nana fëmijën, ohh shqiptarët e mi të dashur! E ju premtoj se cdo vit kam me ju dhanë një koncert të këtillë, për çdo vit kemi me i këndue bashkë dashnisë e lirisë”, ka shkruar Lahaj ndër të tjerash.
Ai gjithashtu falënderoi komunën e Prishtinës që ishte nikoqire e koncertit dhe kolegët e tij ndërkombëtarë që erdhën për të perfomuar.
Statusi i tij i plotë:
Mundesh me qenë me fat, me i rae tanë dynjasë rreth e përqark, po dashninë si në tokën nanë s’e gjen askund! Aty ku ta shijojnë e dëgjojnë çdo frymëmarrje, sikur të ishte e fundit. Aty ku vuajtja e gëzimi na rrëmbejnë njëkohësisht, sepse kemi vuajt shumë që m’u mbledhë kështu… pa frikën nga pushtuesi, e për të k’nue gjithçka që na do zemra në tokën që sakrifikuam aq shumë për të.
Nga sheshi i të madhit Skënderbe, e me hovin e trokut të tij, sh’iptarët do t’i biejnë botës anë e mbanë, për me tregue që jemi diamanti i Evropës, jo ai qe ju është e shtremnue ndër shekuj!
Ju dua, qysh e do nana fëmijën, ohh sh’iptarët e mi të dashur! E ju premtoj se cdo vit kam me ju dhanë një koncert të këtillë, për çdo vit kemi me i këndue bashkë dashnisë e lirisë.
Një falënderim i madh për komunën e Prishtinës, orkestrës mbarëkombëtare dhe kolegëve të mi nga vendi e ndërkombëtarë.
I juaji përgjithmonë.