R. Kelly është akuzuar se korruptoi një zyrtar qeveritar për të marrë një dokument identifikimi fals që të martohej me një vajzë nën moshë në vitin 1994.
Vajza, e identifikuar në dokument si Jane Doe, mendohet se është këngëtarja Aaliyah.
Ata u martuan kur ajo ishte vetëm 15 vjeçe ndërsa R. Kelly, 27 vjeç. Por në certifikatë mosha e Aaliyah u shënua 18 vjeç.
R. Kelly gjithashtu po përballet me disa akuza për abuzim seksual dhe gjyqet do mbahen vitin e ardhshëm në Çikago e New York.
Por këngëtari i ka mohuar të gjitha akuzat.
Aktakuza më e fundit penale u ngrit nga prokurorët federale në Brooklyn, New York.
Sipas akuzave, R Kelly dhe shoqëria e tij drejtuan rreth ku rekrutoheshin gra dhe vajza nën moshë për veprimtari seksuale të paligjshme.
R. Kelly, emri i vërtetë i të cilit është Robert Kelly, akuzohet tashmë se i pagoi ryshfet një punonjësi të qeverisë në Illinois për të marrë një dokument fals.
Ky identifikim u përdor më pas për të marrë një licencë martese ku mosha e vajzës shkruhej 18-vjeçe, raporton New York Times.
Sipas dokumenteve të gjykatës ryshfeti u pagua më 30 gusht 1994, vetëm një ditë para marrjes së licencës së martesës me Aaliyah.
Martesa e tyre u anulua muaj më vonë sepse adoleshentja, emri i plotë i të cilës ishte Aaliyah Dana Haughton, ishte nën moshë.
Këngëtarja vdiq në një aksident ajror në vitin 2001. Albumi i saj i parë, Age Ain't Nothing But a Number, u prodhua dhe u shkrua nga R. Kelly.
Steven Greenberg, avokati i R. Kelly, tha për ABC News në fillim të këtij viti se klienti i tij nuk e dinte se Aaliyah ishte 15 vjeç kur u martuan.
