Aktori meksikan Enrique Rocha, ka ndërruar jetë këtë të dielë në moshën 81-vjeçare. Ai njihej për karrierën e tij të gjatë në telenovela, ku dallonte për zërin dhe personalitetin misterioz, që e bënë atë një ndër aktorët më të preferuar sidomos për rolet antagoniste.
Shkaku i vërtetë i vdekjes ende nuk është bërë i ditur zyrtarisht, por mendohet se u nda nga jeta për shkaqe natyrale.
Aktori lindi në shtetin qendror të Guanajuato, më 5 janar 1940. Në moshë shumë të re ai mbërriti në Mexico City, ku studioi nga shkolla fillore deri në universitet, duke u diplomuar për arkitekturë në Universitetin Kombëtar Autonom të Meksikës (UNAM).
Rocha nuk e kishte imagjinuar kurrë se fati i saj ishte në aktrim. Një ditë iu dha rastësisht një mundësi që do t'i ndryshonte jetën dhe për të cilën do të kalonte nga arkitektura në skenë. I ftuar nga një mik, Enrique Rocha shkoi në provat e "Despertar de la Primavera", një shfaqje që po drejtohej nga Juan José Gurrola. Kur aktori Juan Ibáñez nuk shkoi në provë, Gurrola e ftoi Rocha të ngjitej në skenë për të thënë pjesën e tij. Me mbarimin e pjesëmarrjes, regjisori u interesua për zërin dhe pamjen e tij të veçantë dhe e ftoi të ishte pjesë e shfaqjes. Atëherë filloi karriera e tij e madhe e aktrimit, kryesisht në teatër e më pas në filma.
Kur ishte vetëm 21 vjeç, Rocha interpretoi në një nga veprat më të rëndësishme, “Hamleti”, dhe më pas atij iu hapën dyert e televizionit.
