Këngëtarja shqiptare me famë botërore, Rita Ora, ka zbuluar një detaj interesant dhe mjaft argëtues nga fillimet e karrierës së saj, gjatë një interviste të dhënë së fundmi për BBC Radio 2.
Në bisedën me gazetarin e radios britanike, Rita foli rreth këngës së saj më të fundit “All Natural”, e cila është pritur ngrohtë nga publiku dhe kritika, por gjithashtu ndau edhe një histori gazmore nga vitet e para të famës së saj.
Gazetari e pyeti këngëtaren nëse është e vërtetë që, në periudha kur kishte shumë angazhime, ajo e kishte përdorur motrën e saj, Elena, si “doppelganger (dublante)” për të dhënë disa intervista në telefon në vend të saj - për shkak se zërat e tyre janë pothuajse identikë.
Rita e pranoi me të qeshur këtë histori, duke treguar se kjo kishte ndodhur në fillimet e saj, kur ishte “tepër e zënë” me promovime në disa vende njëkohësisht.
“Po, është e vërtetë” – u përgjigj ajo mes të qeshurash. “Elena është motra ime, e njeh mirë çdo detaj për mua, kështu që i thoja: ‘Hajde, bëje një telefonatë për Zelandën e Re, unë po bëj një tjetër për Australinë!’ Dhe ajo thoshte: ‘Përshëndetje, jam Rita Ora!’”, tregoi këngëtarja.
Rita shtoi me humor se ndoshta disa radio nëpër botë as që kanë kuptuar ndonjëherë se në fakt po flisnin me motrën e saj: “Ndoshta Elena ka dhënë tërë intervista për stacione të tëra radioje në Australi e Zelandën e Re duke u prezantuar si unë”, – tha ajo duke qeshur. – “Duhej të bëja çfarë duhej bërë, ishte një periudhë shumë e ngarkuar”.
Pjesa më e fundit e intervistës u mbush me të qeshura, ndërsa Rita sqaroi se ndonëse motra e saj nuk i ngjan shumë fizikisht, zërat e tyre janë “thuajse identikë”.
Ky rrëfim simpatik i Ritës është komentuar gjerësisht në rrjete sociale, duke marrë vëmendje për mënyrën spontane dhe plot humor me të cilën këngëtarja tregon për fillimet e saj në industri.
