Gjykata Themelore në Prishtinë ia ka caktuar Gjestit 30 ditë paraburgim.
Ai dyshohet për tri vepra penale.
Njoftimi:
Caktohet masa e paraburgimit ndaj të pandehurit B.K. për shkak të dyshimit të bazuar se ka kryer tri vepra penale
Prishtinë 13 Mars 2026 - Gjykata Themelore në Prishtinë - Departamenti i Përgjithshëm - Divizioni për Çështje Penale ka vendosur lidhur me kërkesën e Prokurorisë Themelore në Prishtinë, për caktimin e masës së paraburgimit ndaj të pandehurit B.K., për shkak të dyshimit të bazuar se ka kryer veprat penale Kanosja, Asgjësimi apo dëmtimi i pasurisë si dhe veprën penale Mbajtja në pronësi, kontroll ose posedim të paautorizuar të armëve.
Gjyqtarja e procedurës paraprake pas dëgjimit të palëve në procedurë dhe pas analizimit të shkresave të lëndës gjeti se kërkesa e Prokurorisë Themelore në Prishtinë për caktimin e masës së paraburgimit është e bazuar, andaj aprovoj kërkesën e PTHP-së, për caktimin e masës së paraburgimit ndaj të pandehurit B.K., ashtu që të njëjtit iu është caktuar masa e paraburgimit në kohëzgjatje prej 1 (një) muaji.
Gjykata vlerësoj se caktimi i masës së paraburgimit në këtë çështje penale është masë adekuate dhe konstatoi se ekzistojnë rrethana që tregojnë se ekziston rreziku i ikjes, rreziku i ndikimit në dëshmitarë dhe rreziku i përsëritjes së veprës penale, andaj masa e paraburgimit tani për tani është e vetmja masë për rrjedhjen e pa penguar të procedurës penale.
Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.
Babai i Gjestit shihet jashtë Gjykatës ku po mbahet seanca ndaj artistit
Këngëtari nga Peja, Besart Kelmendi, i njohur me emrin artistik “Gjesti”, sot u paraqit para gjykatës për të përballuar akuzat që rëndojnë mbi të.
Ai akuzohet për armëmbajtje pa leje, kanosje dhe dëmtim të pasurisë së huaj, çështje që kanë tërhequr vëmendjen e mediave dhe publikut.
Seanca po zhvillohet me dyer të mbyllura, një masë e zakonshme në raste që lidhen me sigurinë dhe privatësinë e të akuzuarit, duke u përpjekur të ruhet qetësia dhe rendi brenda gjykatës.
Babai i Gjestit shihet jashtë Gjykatës
Megjithatë, jashtë objektit të gjykatës në Prishtinë, situata ka qenë e dukshme, me praninë e babait të tij, Jeton Kelmendi, i cili ishte i shoqëruar nga disa persona të tjerë.
Me dyer të mbyllura, nis seanca ndaj Gjestit
Ka nisur seanca dëgjimore ndaj këngëtarit Besart Kelmendi, i njohur me emrin artistik “Gjesti”.
Seanca që ka nisur pak më parë po mbahet e mbyllur.
Ai u ndalua të mërkurën nën dyshimin për veprat penale “armëmbajtje pa leje”, “kanosje” dhe “dëmtim i pasurisë”.
Prokuroria kërkon paraburgim, Gjesti del sot para gjykatës
Në Gjykatën Themelore në Prishtinë pritet të mbahet sot seanca e parë dëgjimore ndaj këngëtarit Besart Kelmendi, i njohur me emrin artistik Gjesti.
Ai u ndalua të mërkurën nën dyshimin për veprat penale “armëmbajtje pa leje”, “kanosje” dhe “dëmtim i pasurisë”.
Zëdhënësja e Gjykatës Themelore në Prishtinë, Mirlinda Gashi, ka konfirmuar se Prokuroria Themelore në Prishtinë ka paraqitur në gjykatë kërkesë për caktimin e masës së paraburgimit ndaj tij.
Seanca dëgjimore pritet të mbahet duke filluar nga ora 09:30.
