Gruaja e Tyson Furyt, Paris Fury, ka rrëfyer se kishte abortuar vetëm disa orë para meçit rikthyes të burrit të saj, porse e kishte mbajtur të fshehtë deri në fund të duelit.
Ish-kampioni i botës kishte munguar 32 muaj dhe po e zhvillonte përballjen e tij rikthyese në muajin qershor ndaj boksierit shqiptar, Sefer Seferi.
Pikërisht në atë periudhë, gruaja e tij e kishte humbur fëmijën, mirëpo vendosi të mos i tregonte, sepse kishte frikë se lajmi i hidhur do ta shpërqendronte.
Në një intervistë për Sunday Mirror, 28-vjeçarja ka treguar se ishte tetë javë shtatzënë, ndërsa në ditën e meçit e kishte kuptuar se ka pasur abort spontan.
“Nuk ia përmenda Tysonit para se të hynte në ring. Ndërsa menjëherë pas meçit ia thashë dhe të nesërmen shkuam në spital dhe kjo gjë u konfirmua”.
“Pesë javë më pas mbeta sërish shtatzënë dhe tash foshnja jonë e re, një djalë, do të lindë në mars. Ishim akoma me zemër të thyer për humbjen tonë, por njëkohësisht edhe të lumtur (për fëmijën tjetër)”, ka rrëfyer Paris.
Në vitin 2014, gruaja e boksierit ka pasur një tjetër abort, pikërisht në kohën kur xhaxhai tjetër i Furyt, Hughie, po vdiste në të njëjtin spital.
Paris është takuar me Furyn kur ajo ishte vetëm 15-vjeçare, ndërsa në një rrëfim të mëparshëm ka treguar se kishin pritur deri në martesë për marrëdhënien e parë intime.
