Kryetari i komunës së Mitrovices, Agim Bahtiri ka pritur në takim kryetarin e Sindikatës së Pavarur të Trepçës, Shyqyri Sadiku, ku kanë diskutuar rreth deklaratës së zëdhënëses së BE-së, Maja Kocijançiq.
Ai përmes një postimi në Facebook ka theksuar se “ne kundërshtojmë fuqishëm këtë deklaratë, pasi që tema mbi 'Trepçën' nuk guxon të jetë asnjëherë pjesë e diskutimeve në Bruksel, sepse ajo është e minatorëve dhe përbën një pasuri kombëtare”
Postimi i plotë:
Me kryetarin e Sindikatës së Pavarur të Trepçës, Shyqyri Sadiku, diskutuam lidhur me deklarimet e fundit të zëdhënëses së BE-së, Maja Kocijançiq, e cila ka thënë se çështja e 'Trepçës' duhet të zgjidhet nëpërmjet marrëveshjes gjithëpërfshirëse për normalizimin e dialogut ndërmjet Prishtinës dhe Beogradit në Bruksel, edhe përkundër faktit që Kuvendi i Republikës së Kosovës para pak ditësh ka votuar statutin e ri për 'Trepçën'.
Ne kundërshtojmë fuqishëm këtë deklaratë, pasi që tema mbi 'Trepçën' nuk guxon të jetë asnjëherë pjesë e diskutimeve në Bruksel, sepse ajo është e minatorëve dhe përbën një pasuri kombëtare. Andaj një diskutimi i tillë do të cenonte direkt sovranitetin e Republikës së Kosovës.
Ishte dakordim i përbashkët i yni se Maja Kocijançiq duhet të tërheq qëndrimin e saj për çështjen e 'Trepçës' përmes një deklarate. Në ty kundërtën Sindikata e Pavarur e Minatorëve të 'Trepçës' shumë shpejt do të organizoj protesta para zyrave të BE-së në Prishtinë.