Menaxhmenti serb i “Trepçës” në veri, që punon, prodhon e shet ndaras nga “Trepça” në jug, ka vënë në shitje koncentratin e zinkut që prodhohet brenda kësaj ndërmarrje ekonomike.
Zinku që do të shitet është nxjerrë nga dy miniera.
Në dosjen e tenderit është bërë e ditur se koncentrati i zinkut është nxjerrë nga miniera e Bellobërdës dhe Cërnacit, ndërsa është përpunuar në fabrikën e Flotacionit të Leposaviçit.
Në përshkrimin e tenderit bëhet e ditur se vlera e zinkut që do të shitet është afro 10,000.00 ton.
“Trepça mban të drejtën për të negociuar me ofertuesin më të lartë”, thuhet në tenderin e publikuar.
Në dosjen e tenderit për shitjen e zinkut është kërkuar që oferta të bëhet në dollarë, bazuar në bursën “London Metal Exchange’.
Vlera e parashikuar e kontratës është 8,005,680.00 euro apo në dollar 9,000,00,00 $.
Në dosjen e tenderit thuhet se ofertuesit e interesuar me shpenzime të veta, mund të marrin mostra nga prodhimi aktual.
Ndërsa, është bërë e ditur edhe përbërja e elementeve afërsisht 10 mijë ton zink.
Përmbajtja mesatare e pritshme për Zn në një koncentrat zinku është 48%.
Data e përgatitjes së dosjes së tenderit është 5 korrik, ndërsa ky tender është valid për një periudhë prej [90] ditë nga data e fundit e dorëzimit të tenderit.