Rakiq: Nuk e di që ka struktura kriminale në veri - Bota Sot
Rakiq: Nuk e di që ka struktura kriminale në veri

Mitrovica

E premte, 19 tetor 2018

Rakiq: Nuk e di që ka struktura kriminale në veri

Më: 27 janar 2018 Në ora: 09:07
Goran Rakiq

Goran Rakiq, ka deklaruar të premten në Mitrovicë se nuk ka njohuri nëse në komunën që e drejton ekzistojnë struktura kriminale, ashtu siç shkruajnë mediet. Ai ka mohuar të ketë banda kriminale në veri të Mitrovicës, të cilat, siç kanë konstatuar shumë politikanë serbë të veriut të Kosovës, janë pushteti i vetëm në veri. Gjithashtu Rakiq ka kërkuar që vrasja e Ivanoviqit të zbardhet sa më shpejt.

“Kam kërkuar nga Policia e Kosovës që të dalë me një komunikatë rreth vrasjes së Oliver Ivanoviqit dhe hetimeve që janë duke u zhvilluar për t’i gjetur autorët. Nuk dëshiroj të ketë spekulime vetëm për poenë politikë në rastin e Ivanoviqit, siç është duke u bërë. Por, Policia e Kosovës nuk ka mundur të precizojë se deri ku kanë arritur me hetimet dhe kur organet kompetente do të dalin me njoftim rreth hetimeve që janë duke u bërë”, ka thënë Rakiq, i cili nuk ka dashur të japë komente rreth gjendjes së sigurisë në qytetin e Mitrovicës pas vrasjes së liderit të SDP-së dhe këshilltarit të Kuvendit të Mitrovicës së Veriut, Oliver Ivanoviq.

“Policia e Kosovës ka prezantuar të enjten statistikat, të cilat tregojnë ‘se gjendja e sigurisë është më e mirë se viteve të mëhershme’”. Unë nuk jam në dijeni se në veri ka struktura kriminale, për të cilat kanë shkruar mediet në Beograd ditëve të fundit dhe në muajt e fundit. Derisa është vrarë, për diçka të tillë ka treguar dhe vetë Ivanoviq”, ka thënë Rakiq.

Në anën tjetër, zëvendësdrejtori i Drejtorisë Rajonale të Policisë së Kosovës në veri, kapiten Besim Hoti, tha të premten se Grupi Punues i formuar nga Qeveria e Kosovës, e me miratimin e Këshillit të Prokurorëve të Kosovës, është duke punuar intensivisht për mbledhjen e dëshmive në rastin “Ivanoviq”. “Nuk ka informata të reja, të cilat kur të vijë koha publikut do t’ia prezantojë Grupi Punues për hetimet për vrasjen e Ivanoviqit dhe prokurori publik Shyqyri Syla”, ka sqaruar kapiten Hoti.

Merret vesh në ndërkohë se deklarata në Policinë e Kosovës kanë dhënë: zëvendëskryetarja e SDP-së, Ksenija Bozhoviq dhe sekretarja e SDP-së, Silvan Arsoviq, shkruan zeri. Ato kanë qëndruar rreth dy orë e gjysmë në Polici, ndërkohë që, siç kanë thënë ato për mediet në veri të Mitrovicës, “nuk kanë marrë asnjë informacion lidhur me rrjedhën e deritashme të hetimeve”.

Zbardhjen e vrasjes së Ivanoviqit e ka kërkuar edhe shefja e Administratës në komunën veriore të Mitrovicës, Adriana Hoxhiq, duke shfaqur shpresën se autorët e vrasjes do të gjenden dhe do të dalin para drejtësisë.

Shfaq komentet
comments powered by Disqus
Sot mund të lexoni Shfletoni kopertinat
Sondazh
test