Njësia për Reagim të Shpejtë pozicionohet në Mitrovicë, do të reagojë në rast të barrikadave - Bota Sot
Njësia për Reagim të Shpejtë pozicionohet në Mitrovicë, do të reagojë në rast të barrikadave

Mitrovica

Njësia për Reagim të Shpejtë pozicionohet në Mitrovicë, do të reagojë në rast të barrikadave

Më: 22 nëntor 2018 Në ora: 14:24
Autoblindat e policisë në Mitrovicë

(E plotësuar) - Pjesëtarë të Njësitit për Reagim të Shpejtë (NJRSH) në kuadër të Policisë së Kosovës së bashku me autoblindat e tyre po qëndrojnë në Kampin ‘Belvedere’ në fshatin Frashër të Mitrovicës.

Burime të mediave  bëjnë të ditur se ata kanë arritur nga Prishtina dhe vende tjera të Kosovës për të reaguar në veri në rast nevoje. 

“Ka zëra se serbët po përgatiten të vendosin barrikada në disa pozicione kyçe që lidhin jugun me veriun e vendit, duke përfshirë këtu edhe urën kryesore mbi Ibër në Mitrovicë. Në atë rast policia do të reagojë menjëherë për të mos lejuar këto barrikada”, kanë thënë burimet.

Burimet më tej kanë shtuar se nëse marrin urdhër nga Beogradi, serbët e veriut përveç urës kryesore, kanë në plan të vendosin barrikada edhe në fshatin Rudarë e Zupç, si dhe në disa vende tjera, me ç’rast do të paralizohej qarkullimi i automjeteve në drejtim të pikave kufitare Jarinje dhe Bërnjak.

Policia dematon lajmet e mediave se autoblindat janë dërguar në veri

Presidenti i Serbisë Aleksandar Vuçiq, në fillim të takimit me përfaqësuesit e serbëve të Kosovës ka thënë që Beogradi ka informata se trupat shqiptare nga baza Belvedere dhe Vrellë janë nisur në drejtim të veriut.

Vuçiq ka thënë se janë të mundshme dy synime të Prishtinës.

“Përsëri e kanë marrë atë barkën e shpejtë me të cilën Thaçi ka shëtitur nëpër Ujman. Ka mundësi që po nisen në kontrollë të liqenit për të treguar muskujt dhe ta kontrollojë të ashtuquajturin “kalimin e gjelbër” në veri për të penguar kalimin e mallrave në drejtim të pjesëve serbe në Kosovë” ka thënë Vuçiq.

Një gjë e tillë është mohuar nga Zëvendësdrejtori i Stacionit Policor në Veri Besim Hoti.

Hoti për Kallxo tha se nuk ka lëvizje dhe se nuk janë të vërteta raportimet e mediave.

“Nuk ka asnjë lëvizje. Nuk ka asgjë në lidhje me këtë që po më thoni për momentin”, tha Hoti për Kallxo

Në anën tjetër Kallxo, mëson se Njësia Speciale e Kosovës, baza në Prishtinë, janë në gjendje gatishmërie për të reaguar nëse ka nevojë.

Gazeta N1, vazhdoi raportimin duke thënë se Presidenti Vuçiq ka shtuar se Beogradi do të përcjellë zhvillimin e situatës në terren.

Vuçiq ka thënë edhe se vendimi i Qeverisë së Kosovës për t’i rritur taksat për mallërat serbe në 100% praktikisht e pamundëson qarkullimin e mallrave serbe.

Ka thënë edhe që vënia në zjarr e prodhimeve serbe në Kosovë kujton në vënien në zjarr të librave jevrej në Gjermaninë naciste.

Vuçiq ka përshëndetur reagimin e Bashkimit Evropian ndaj masave të Prishtinës, duke e shpresuar se Brukseli do t’i sjellë në vete udhëheqësinë kosovare.

Presidenti ua ka bartur të pranishmëve edhe deklaratën e fundit të kryeministrit të Kosovës Ramush Haradinaj që nuk do të tërhiqen taksat deri sa Serbia të mos e pranojë Pavarësinë e Kosovës.

“Kjo na bjen në pozitë të tmerrshme. Prapa kësaj qëndrojnë fuqi tjera të mëdha të cilat janë sillur si të paafta. Nuk e ka menduar Haradinaj krye në vete “ose do ta rrënojmë qeverinë në Beograd ose do t’ju duhet të na pranojnë”. Ai këtë gjë e ka të lexuar. Fatmirësisht, ka qenë mjaft i pakujdesshëm që atë të cilën e ka lexuar nga një copë letre menjëherë ta publikojë. Atëherë, do të na duhet që të bëhemi gati për një betejë të gjatë dhe të rëndë, ngase pavarësinë nuk do ta pranojmë”- ka porositur Vuçiq.

Autoblindat e policisë shfaqen në Mitrovicë

Disa automjete të blinduara të Policisë së Kosovës janë parë duke qarkulluar në rrugët e Mitrovicës Jugore.

Një dëshmitar ka dërguar foto nga vendi i ngjarjes, ku shihen disa mjeta të rënda të policisë të blinduara.

Ende nuk dihet arsyeja pse janë vënë në qarkullim këto automjete.

Shikoni me poshtë pamjet.

Image
Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...