Telefonat premium që synojnë të ofrojnë ekran të plotë pa kornizë janë trendi i ri i industrisë, mirëpo prodhuesi i famshëm kinez, Xiaomi me sa duket do ta lartësojë në një nivel krejt tjetër këtë gjë, me modelin e ri të telefonit Xiaomi Mi MIX 2.
Versioni fillestar i Mi MIX e ka arritur këtë synim të kompanisë deri në një masë, mirëpo brezi i ri i kësaj linje me sa duket do ta heq gjithë kornizën prej ekranit, e cila megjithatë gjendet edhe në modelet e reja të telefonave sikurse Galaxy S8, LG G6 e madje edhe Essential Phone.
Dizajneri francez, Philippe Starck, ka postuar konceptin e këtij telefoni i cili pothuajse nuk ka korniza fare në të trija anët, ndërsa edhe në pjesën e poshtme, korniza e telefonit është sa gjysma e asaj që sot gjendet në Galaxy S8.
Natyrisht, videot e konceptit janë zakonisht dëshira dhe ide të dizajnerëve. Por kur një koncept video vjen nga dizajner zyrtar dhe aktual i një produkti, në një linjë produkti që ai tashmë ka pasur përvojë, distanca midis konceptit dhe realitetit zvogëlohet ndjeshëm.
Ne tashmë e dimë se Mi MIX 2 do të arrijë këtë vit dhe kur të vijë – nëse duket diçka ngjashëm si në këtë video – atëherë Xiaomi do ta hedhë dizajnin e telefonave Android në një nivel tjetër, gjithsesi.
