Dhjetëra mijëra njerëz kanë protestuar në qytetin e skajit lindor të Rusisë, Khabarovsk, kundër arrestimit të guvernatorit lokal. Megjithatë, një detaj ka rënë në syrin e disa njerëzve ose të paktën të futbolldashësve.
Në një fotografi të publikuar nga Evropa e Lirë, një djalë shihet duke e mbajtur pankartën me fotografinë e guvernatorit të arrestuar. Ajo që bie në sy është veshja e tij.
Ai e ka veshur fanellën e Real Madridit, të cilën klubi madrilen e përdor kur luan si mysafir, ndërsa poshtë kishte veshur rroba sportive me logon e Barcelonës.
Këto dy ekipe janë ndër rivalet më të mëdha në historinë e futbollit, jo vetëm në Spanjë, por edhe në tërë botën dhe tifozët e tyre gjithashtu dallohen për rivalitetin e madh mes vete.
Megjithatë, duket se djaloshi në fotografi nuk i ka kushtuar shumë rëndësi këtij fakti dhe ka vendosur që me këtë veshje kundërthënëse për ata që përcjellin futboll të dalë në ballë të protestës.
