Prokurorja e Përgjithshme e Nju Jorkut, Letitia James publikoi të premten një video rrëqethëse që tregon momentin kur oficerët e policisë godasin me elektroshok një burrë, pasi ai kishte lagur veten me dezinfektuesin e duarve. Pas goditjes burri shpërtheu në flakë ndërsa oficerët u larguan menjëherë nga dhoma.
Zyra e Prokurorit të Përgjithshëm tha se pamjet janë pjesë e hetimit për vdekjen e 29-vjeçarit Jason Jones, i cili ndërroi jetë më 15 dhjetor 2021.
Zyra e AG tha se Jones hyri në Departamentin e Policisë Catskill, ku filloi një grindje verbale me tre oficerë. Videoja nuk përfshin audio; megjithatë, oficerët duket se përpiqen të flasin me Jones për rreth 30 minuta ndërsa ai endet i shqetësuar nëpër komisariat.
Më vonë në video, Jones shihet duke hequr këmishën e tij para se të marrë një enë të madhe me dezinfektues duarsh dhe ta spërkatë mbi qafën, kokën dhe shpinën e tij. Kur një oficer përdor një armë trullosëse në një përpjekje për ta nënshtruar atë, Jones shpërthen në flakë.
Jones ishte shtruar në spital që nga incidenti derisa u shpall i vdekur në dhjetor.
