Mediat serbe dhe ndërkombëtare më datë 17 janar 2019 i dhanë jehonë të madhe vizitës së Vlladimir Putinit, presidentit të Rusisë në Serbi. Edhe nikoqiri Aleksandër Vuçiq edhe mysafiri Vlladimir Putin këtë vizitë e quajtën si shumë të suksesshme që i shërben thellimit të marrëdhënieve vëllazërore mes dy popujve të tyre. Putini para mediave deklaroi se do ti qëndrojë përkrah Serbisë ekonomikisht, ushtarakisht e ndekombëtarisht, si edhe lidhur me çështjen e Kosovës. Ndërkaq Vuçiq falenderoi vllaun e tij rus duke u shprehur se Serbia është e hapur ndaj Kosovës për të gjetur një kompromis të përbashkët dhe se çështja me Kosovën nuk do të zgjidhet pa përfshirjen e Rusisë.
Këtë vizitë po ta vëmë në dioptri të një analize do të arrijmë në përfundim se as Putini dhe as Vuçiqi nuk ia duan të mirën Ballkanit dhe thjesht janë nën ndikimin e egos së tyre të sëmurë për konflikte dhe hegjemoni. Mos shkojmë shumë larg por të përqëndrohemi në Kosovë dhe në luftën e fundit që u zhvillua këtu të provokuar e nxitur nga Serbia. Atë që Putin e arrijti duke e pushtuar Krimenë me siguri shpreson që këtë mund ta arrijë edhe Vuçiqi në Kosovë-
Zotërinj Putin dhe Vuçiq, duket se po mendoni mirë për veten tuaj por harroni fare se kjo që po mendoni është në dëm të shqiptarëve dhe të paqes së përgjithshme në Ballkan. Ballkanit i kanë ardhur në majë të hundës Carët rusë e Kralët serbë, si edhe Leninat, Stalinat, Hrushovët e Jelcinët rusë, dhe se nga ndikimet e tyre në Ballkan më së shumti kanë pësuar shqiptarët. Ju të dy e dini fort mirë çfarë tmerresh bëri Serbia ndaj shqiptarëve në Kosovë e çfarë tragjedishë të përgjakshme i shkaktoi Serbia Kosovës në vitet 1998\99, duke e shkrumuar e shkatërruar Kosovën, duke vrarë 15 mijë shqiptarë kosovarë , duke dhunuar 18 mijë femra shqiptare dhe duke detyruar një egzod të afër 1 milion shqiptarëve për të shpëtuar jetën nga sulmet serbe.
Pal Lekaj, ish deputet nga Gjakova para disa vitesh në një debat në parlamentin e Kosovës ku flitej për krimet serbe në Kosovë para të pranishëmve u shpreh se, “ Një nënë gjakovare e përvëluar thellë në shpirt më rrëfeu se si ushtarët serbë kishin hy në oborrin e shtëpisë së saj dhe ia kishin rrëmbyer vajzën e vetme 15 vjeçare. Vajza duke qarë i ishte drejtuar nënës ta ndihmojë. Nëna ishte vërsulur mbi ushtarët serbë për ta shpëtuar vajzën, e kishte mbërthyer vajzën për koke për ta shpëtuar, por ushtarët serbë nënën e kishin hudhur për toke dhe ishin larguar me vajzën e saj të rrëmbyer. Nënës i kishin mbetur në dorë vetëm disa qime të flokëve të vajzës të cilat i ruan edhe sot e kësaj dite. Kjo nënë vajzën e vet nuk e pa më kurrë”. Çfarë mund ti themi kësaj nëne ose mijëra nënëve tjera që patën raste të ngjashme.
Mendja e shëndoshë nuk mund ta kuptojë se çfarë kompromisi Serbia dëshiron të arrijë me Kosovën për të mbetur e kënaqur, pas të gjitha këtyre masakrave, dhunimeve, krimeve shtazarake e mizorive të kryera në Kosovë. Shqiptarët dhe Ballkani duan paqe, prosperitet zhvillimi në të gjitha sferat e jetës dhe marrëdhënie të mira me të gjithë popujt e tjerë, por këtë garanci dhe siguri e ofron vetëm Perëndimi dhe NATO, dhe jo Rusia e Serbia.
Zotërinj Putin dhe Vuçiq, është e ditur se serbët në Ballkan kanë ardhur në shekullin e 6-të nga Karpatet, edhe atë pikërisht në trojet ku kanë jetuar Ilirët, pasardhësit e të cilëve janë vetëm shqiptarët dhe askush tjetër. Ekzistojnë shumë dokumente historike se serbët kufijtë e tyre i kanë zgjeruar me sulme të përgjakshme, me vrasje, plaçkitje e djegie sidomos ndaj shqiptarëve. Në këtë mënyrë serbët e kanë pushtuar edhe Kosovën edhe një pjesë të madhe të territoreve tjera shqiptare me qëllim që të dalin gjer në Detin Adriatik. Ka qenë doktrinë ruse e serbe, doktrinë e Carëve rusë dhe e Kralëve serbë, e ndjekur edhe nga Garashanini dhe Qubrilloviqi, që në vendet e okupuara të trojeve shqiptare toponimet vendase menjëherë të zëvendësohen me toponime serbe, që në këto vende të okupuara shqiptare të vendosen shkolla serbe, të ndërtohen kisha dhe manastire megalomane me pasuritë e plaçkitura , siç ka ndodhur në Kosovë, ku sot e kësaj dite në Kosovë jetojnë vetëm 5 përqind e populllataës së entitetit serb e që i gëzon të drejtat më shumë se çdo pakicë tjetër në botë. Shqiptarët nuk vajtën në Beograd dhe kryen atje krime ndaj populllatës serbe, por ishin serbët ata që e okupunan Kosovën dhe kryen krime e masakra ndaj shqiptarëve në Kosovë.
Të dhënat historike flasin se mbreti Bardhyl ishte themeluesi i mbretërisë Ilire në shekullin e IV para Krishtit dhe kjo mbretëri shtrihej nga Trieshta e gjer në Gjirin e Artës në jug. Të dhënat historike tregojnë se para 2500 viteve mbreti Bardhyl sundonte territorin ku sot ndodhet Beogradi, dhe se në këtë territor para 2500 viteve është folur gjuha ilirishte pasardhëse e së cilës është gjuha shqipe.
Zotërinj Putin dhe Vuçiq, kam shkruajtur e botuar shumë tekste dhe po e përsëris edhe njëherë në këtë letër të hapur që po ua drejtoj juve të dyve, se në Hartën e Enciklopedisë Ruse të vitit 1817, shihet sa ka qenë Serbia e vogël, sa Sanxhaku i Beogradit, të cilin e kanë okupuar serbët në shekullin e 6-të me ardhjen e tyre nga Karpatet. Ky faksimil i hartës së Enciklopedisë Ruse të vitit 1817, tregon qartë kufijtë realë të Serbisë në periudhën e viteve 1804, 1810, 1812, 1815, 1820, 1867 që janë shënuar në brendinë e kësaj harte. Kjo hartë e Enciklopedisë Ruse hedh poshtë atë që thonë serbët se Kosova me shekuj paska qenë e Serbisë.
Zotërinj Putin dhe Vuçiq, po e përsëris edhe njëherë për tua përkujtuar argumentin më bindës edhe lidhur me Dibrën, të cilën për qëllime okupuese serbët e kanë djegur tri herë duke plaçitur miliona franga ari, stoli, orendi dhe bagëti, sepse Dibra asokohe ka qenë krahinë shumë e pasur me bujqësi, ekonomi dhe tregëti shumë të zhvilluar, dhe e gjithë kjo plaçkë është dërguar në Beograd, duke e detyruar popullatën dibrane të largohet për në zonat e thella shqiptare për tu shpëtuar plumbave dhe bajonatave serbe. Për këtë lulzim ekonomik e kulturor të Dibrës asokohe thuhej, “ po qe se digjej Stambolli mund ta rindërtojë Dibra, ndërsa po të digjej Dibra nuk mund ta rindërtonte dot Stambolli”.
Zotërinj Putin dhe Vuçiq, kufiri i tanishëm i Dibrës u vendos qysh në Kongresin e Berlinit në vitin 1878, në Konferencën e Ambasadorëve në Londër në vitin 1913 dhe në Konferencën e Paqes në Paris në vitin 1920 kundër vullnetit të banorëve të këtushën që u detyruan të shkëputen nga shteti amë Shqipëria. Lidhur me këto ngjarje tragjike për dibranët gjatë vendosjes së kufirit në Krahinën e Dibrës, nuk u zbatua as konfiguracioni natyror dhe as as vullneti njerëzor e politik i dibranëve.
Shkrimtarja amerikane Rous Uajder Lein në vitet e 20-ta të shekullit 20-të, në librin e saj “Majat e Shalës”,shkruan se “Qyteti i Dibrës iu muar Shqipërisë me vijën kufitare të vitit 1913, siç nxirret sythi i një patateje”.
Ndërkaq Dimitrije Tucoviq në librin “ Serbia dhe Shqipëria”, duke përshkruar gjendjen e krijuar në viset e aneksuara nga Serbia, shkruan se, ”aneksimi ndau bujkun prej arës, bagëtinë prej kullotës, tufën prej lugjeve,fshatin prej mullirit,blerësin dhe shitësin nga tregu,rrethin prej qytetit dhe tërë viset malore prej qendrës së tyre ekonomike e hambarët e ushqimit, burimet e jetës u prenë”.
Kështu ndodhi edhe me viset e tjera shqiptare që pa dëshirën e tyre u ndanë nga shteti amë vetëm për shkak të pretendimeve okupuese dhe hegjemoniste Serbisë dhe sot i takojnë Maqedonisë dhe Malit të Zi, ndërkaq Shqipëria si pasojë e kësaj padrejtësie sot duket si një molle e kafshuar nga të gjitha anët.
Zotërinj Putin dhe Vuçiq, Këto plagë që Serbia ua shkaktoi shqiptarëve lëngojnë edhe sot e kësaj dite ku shqiptarët nuk janë të barabartë me popujt e tjerë shumicë në shtetet ku jetojnë dhe nuk i gëzojnë as të drejtat dhe liritë elementare njerëzore edhe pse jetojnë në trojet denbabaden shqiptare.
Nuk ekziston asnjë dokument apo gjurmë historike që shqiptarët të kenë okupuar as edhe një pëllëmbë toke të huaj, por përkundrazi janë serbët ata që kanë shkaktuar luftëra të përgjakshme, siç ishin luftërat në shekullin e 20-të në Kroaci, Bosnjë e Hercegovinë dhe në Kosovë, ku serbët ishin ata që shkaktuan vrasje, djegie, dhunime maramendëse dhe gjenocide ndaj popullatës së pafajshme, gjithnjë për ti zgjeruar kufijtë e Serbisë, gjithnjë duke e ringjallur doktrinën serbe edhe nëpërmjet Sllobodan Millosheviqit, Dobrica Qosiqit dhe Akademisë së Shkencave të Serbisë, se kufijtë e Serbisë do të shtrihen deri atje ku jeton edhe një serb i vetëm. Serbia me ndihmën e Rusisë e themeloi edhe Republika Serpksa në Bosnjë e Hercegovinë, që nuk është gjë tjetër veçse plagë kanceroze për këtë rajon dhe kandil i ndezur për konflikte tjera në të ardhmen. Ngjashëm po synoni të veproni edhe me komunat me shumicë serbe në Veri të Kosovës. Kjo është pasqyrë e politikës agresive që ndjekin Rusia dhe Serbia edhe sot e kësaj dite.
Zotërinj Putin dhe Vuçiq, të dhënat flasin se Serbia është shtet që vetëkënaqet. Serbia e gënjen veten se është e fuqishme, gjë që nuk është e vërtetë. E gënjen veten se ka 10 milionë serbë, gjë që nuk është e vërtetë, sepse nuk i ka as 5 milionë si pasojë e natalitetit të vogël dhe se gjithnjë ia bashkangjit vetes edhe humngarezët e Vojvodinës, boshnjakët e Sanxhakut, romët etj. E gënjen veten dhe opinionin se dëshiron të aderojë në BE, ndërsa mendjen dhe zemrën e ka te Rusia. Serbia e gënjen veten dhe opinionin duke e dëshiruar BE-në vetëm për benefitet e jo për obligimet, duke menduar të qëndrojë në dy karige, me njërën në BE dhe me tjetrën në Rusi, gjë që nuk mund të realizohet. Në popull nga përvoja ka mbetur shprehja se “asnjë njeri nuk mund ti mbajë dy shalqinj nën një sqetull”.
Zotërinj Putin dhe Vuçiq, shumë e qëlluar ishte protesta më datë 6 janar 2019 por edhe e viteve më parë e gjakovarëve shqiptarë kur nuk e lejuan pelegrinazhin serb në kishën orthodokse në Gjakovë. Me këtë gjakovarët shprehën revoltën e tyre për krimet serbe në Gjakovë dhe se këto krime nuk do të harrohen kurrë. Kishat orthodokse serbe në Kosovë po përdoren për ti provokuar shqiptarët, për tua pezmatuar edhe më shumë plagët për të afërmit e vrarë e të zhdukur, e jo për qëllime thjeshtë fetare. Pelegrinazhi i mirfilltë fetar duhet të kryhet nga njerëz me bindje të plotë e të sinqertë fetare, me zemër e shpirt të pastër, e jo nga personat me duar të gjakosura me gjakun e shqiptarëve. Në të gjitha masakrat e krimet serbe në Kosovë nuk dëgjuam as edhe një fjalë të vetme kritike qoftë nga Patriarku Irinej – kreu i Kishës orthodokse të Serbisë, qoftë nga ndonjë klerik tjetër orthodoks serb, apo edhe nga ndonjë qytetar i rëndomtë serb. Kriminelët serbë që i kanë duart e përlyera me gjakun shqiptar në Kosovë shëtisin lirshëm në Beograd e gjetiu, ndërkaq Gjykata Speciale në kosovë ngfen aktpadi ndaj ushtarakëve shqiptarë të UÇK-së, të cilët luftuan për të mbrojtur familjet e tyre në pragun e shtëpisë nga vrasësit serbë. Këta ushtarakë shqiptarë bënë një luftë të ndershme e çlirimtare dhe mbi bazën e kodeksit të luftës. Nuk mund të vëndoset një një rafsh Serbia agresore me Kosovën viktimë.
Zotërinj Putin edhe Vuçiq, Serbia në vazhdimësi përpiqet ta frikësojë Kosovën edhe pse Kosova tashmë është shtet i pavarur, ka ushtrinë e saj, ka shumë miq të fuqishëm, është e sinqertë në rrugën e saj drejt BE-së e NATO-s, e ka shtetin amë Shqipërinë anëtare të NATO-s, si edhe faktin që në Ballkan jetojnë më shumë se 6 milionë shqiptarë që në rast nevoje bashkohen si një grusht i vetëm kundër cilitdo armik. Çdo tentim që mund ta provojë Serbia për ta rrezikuar Kosovën do ta pësojë rëndë në të gjitha aspektet. Serbia duhet tia vë gishtin kokës dhe të merr mësime nga e kaluara e afërt. Kosova është shtet i pavarur e sovran, dashamirëse e dëshmuar e paqes. Serbisë nuk i mbetet gjë tjetër veçse ta forcojë fqinjësinë e mirë dhe të sinqertë me Kosovën.
Zotërinj Putin dhe Vuçiq, për të mirën tuaj dhe të paqes në Ballkan, larg duart nga Kosova e cila është e larë me gjakun shqiptar, se ndryshe do ti digjni duart edhe ashtu të përlyera me gjak.