“Korrupsionin nuk ua solla unë...” - Bota Sot
“Korrupsionin nuk ua solla unë...”

Opinione

“Korrupsionin nuk ua solla unë...”

Nga: Fadil Lepaja Më: 2 korrik 2019 Në ora: 10:16
Fadil Lepaja
Është veç propagandë. Nuk ka korrupsion te ne. Fushata ka filluar. Paramendojeni sikur ...!

Lëre fare, se nuk e paramendoni dot. Duket e paimagjinueshme që mund të ndodhë, në shoqërinë tonë dhe në shoqërinë shqiptare në përgjithësi, prandaj ju lus që të e paramendoni një situatë hipotetike, dhe të mos përfshiheni tepër thellë në të. Pra, paramendojeni një ish të burgosur ( i cili në rrethana tona edhe mund të cilësohet si politik) i cili sapo ka dalë nga burgu i sigurisë së lartë, ku e kishin plasur kundërshtarët e tij politik, në luftën e ashpër anti korrupsion, qysh para zgjedhjeve të kaluara.

Pra, ky ish i burgosuri, viktimë e fushatës së mëhershme anti korrupsion,  ka vendosë të formoj një parti politike.

Paramendojeni gjithashtu situatën e pa imagjinueshme sikur të gjitha partitë në pushtet të jenë të korruptuara rëndë, dhe për shkak të korrupsionit të lartë, flasin, më saktë cicërojnë edhe zogjtë në degë, dhe flasin të gjitha kafenetë, përfshi lagjet më të humbura të kasabave tona

Tashmë, në imagjinatën tonë jemi duke e paramenduar situatën kur një ish i korruptuar, e kërkon votën e qytetarëve, pikërisht për të luftuar korrupsionin. Motoja e partisë së re është “Korrupsionin nuk na e sjell askush pa dëshirën tonë”.

E formon partinë, dhe për çudi sallat luksoze të hoteleve, me 5-6 yje mbushen me luftëtarë. Militantët më të zëshëm të kësaj partie në themelim janë pikërisht miqtë të cilët lideri i ardhshëm i kishte zënë në burg, si hajdut të vegjël por të shkathët, rraxhaxhi të ndryshëm, kriminel ordiner, me një fjalë elektorat, qytetarë me të drejtë vote të cilët me motivet më të mira, për veten e tyre, kishin marrë nga ajo çfarë nuk ishte e tyre, qoftë me mjeshtri qoftë me forcë, dhe vetëm për mungesë të një avokati të mirë elitar, i cili nuk e lë as “Eskobar” në burg, kishin përfunduar nëpër burgje.

Gjithnjë jemi duke e paramenduar, me vështirësi këtë situatë, dhe lus lexuesin të mos futet tepër në të, për të humbur kontaktin me realitetin tonë (para) evropian. Pra, fushata është e ashpër, luftë e vërtetë. Ferr i vërtetë nëpër debate televizive. Lideri ynë i ri, i zhurmshëm, nuk lë askënd me fole, dhe në fund gjithnjë mbetet e tija. Në tubimet elektorale, nëpër sheshet e kryeqytetit, masa brohoret e ekzaltuar kundër krimit dhe korrupsionit, dhe mbi të gjitha kërkon ndërrime. Nëpër media, pozitës i rrjedhin afera nga më piktoreske, qoftë për korrupsion, apo eraksion, por sidoqoftë janë tema që klikohen fort dhe krijohet ideja e ndërrimit të madh, se përfundimisht korrupsionit iu thye boshti kurrizor. Po vijnë në pushtet të pa korruptuarit, gëzohet masa.

Në rregull, de, tash mos të flasim për të kaluarën. Ky e kishte vuajtur dënimin për krimet e veta dhe sipas rregullit, nga burgu ka dalë i pastër si loti. E ka kuptuar që korrupsioni është krim i rëndë. Pastaj, duhet ta keni parasysh kush e ka plasur në burg. E futën në burg pikërisht këta që janë aktualisht në pushtet, pra të korruptuarit, dhe jo për tjetër përpos që këta vet të mund të korruptoheshin pa frikë. Kështu, ky mund të llogaritet si hero. Premtimet e tij janë të qarta. Do të fus në burg të gjithë të korruptuarit, që të riedukohen dhe më në këtë vend do të lulëzojnë lulet e xhenetit edhe gjithë lulet e bukura që nuk mund të futen në të dyshimta, si kanabis sativa apo “sativat” e tjera. Do të mbjellim lule në saksi!

Monitoruesit ndërkombëtarë, janë në pjesën më të madhe nga Kalabria, Sicilia, dhe rajone simotra nga kontinenti amë, dhe të gjithë kanë ardhur për të na ndihmuar sidomos për të luftuar krimin e organizuar , bashkë me atë të pa organizuar, i cili sapo përfundon në burg, kryen kurset e nevojshme, dhe organizohet. Kështu që, ja vlen si preventivë me luftua edhe krimin e pa organizuar.

Tash zgjojuni nga gjumi. Te ne nuk ka korrupsion. Mos e kërkoni në burgje. Mos e kërkoni në parti. Mos e kërkoni në shoqëri. Lufta anti korrupsion zhvillohet në nivelin më të lartë. Deri sot këtë këshill e udhëhoqën dy president  dhe nuk gjetën asgjë. Nuk ka korrupsion. Mos e lodhni kokën fare. Kot flet Evropa, kot flet shoqëria civile.

Fushata mbyllet vetëm me fjalën e mbajtur në parlamentin e ri, fjalën që na e kujton Skënderbeun. “Korrupsionin nuk ua solla unë, atë e gjeta në mesin tuaj”, thërret plot entuziazëm evro-komisionerja. Deputetët ngritën në këmbë dhe duartrokitja  frenetike zgjatë disa minuta.

Korrupsioni, tashmë në opozitë, duartroket. Të gjithë duartrokasin. Të gjithë janë kundër korrupsionit.

Te ne nuk ka korrupsion. As nuk kishte, as nuk na e sollën. Jemi keq pa të!

Në seancën e parë të parlamentit, opozita kërkon dorëheqjen e kryeministrit të ri dhe krejt kabinetit. Për korrupsion. Opozita kërkon zgjedhje të parakohshme...
Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...