Koronavirusi erdhi dhe nuk pyeti askënd dhe asnjë.
Bota, i gjithë njerëzimi sot është nën kërcënim dhe në ankth prej pandemisë.
Përballë këtij rreziku të gjithë janë e ndjehen njësoj të kërcënuar, si ata që kanë miliona e miliarda dollarë dhe euro, si ato shtete të forta e të fuqishme ekonomikisht dhe financiarisht, si ato të varfëra e të dobëta.
Por viruse janë edhe ato që i “prodhon” vetë njeriu, janë ato viruse që sjellin jonormalitete shoqërore, vuajtje, rreziqe e kërcënime dhe dëme njerëzve dhe shoqërive lokale dhe asaj globale. Virus është ndotja e ajrit, helmimi i tij nga veprimtaria e papërgjegjshme e njeriut me emetime të gazrave e helmeve nga makinat, avionët e fabrikat; virus është ndotja e ujit të lumenjve,liqeneve ,detrave dhe oqeaneve; virus është ndotja e tokës , prerja dhe shkatërrimi i pyjeve dhe prishja e habitateve dhe e biodiversitetit; virus është krimi, korrupsioni dhe sëmundjet e rënda që vijnë prej politikës së sëmurë.
Sot sikur është “harruar” gara për armatime e shpenzime marramendëse për teknologjinë vrastare njerzore.
Nuk i i erdhen në ndihmë njerëzimit as armët bërthamore, as tanket, as aeroplanet dhe as raketat dhe as teknologjia e sofistikuar ushtarake e kozmike.
Sa mirë do të kishte qenë që këto shpenzime të kishin shkuar për paqen, për shëndetsinë, për të mposhtur dhe zhdukur varfërinë, mjerimin dhe etjen; të kishin shkuar për arsimimin, për punësimin, për mbrojtjen e mjedisit dhe jo për të kundërtën, për në dëm të njerzisë dhe planetit.
Njerëzimi duhet t’i kthehet normalitetit, dhe normalitet do të thotë paqë, siguri jokonflikte; normalitet do të thotë vetëkufizim dhe frenim i lirive negative të egoizmit dhe të pandjesisë e të padhimshurisë shpirtërore; nomalitet do të thotë më shumë përgjegjsi e respekt për veten por edhe për të tjerët; normalitet do të thotë përgjegjsi për tokën , ujin , ajrin dhe planetin i cili na mundëson jetën.
Virusi po kërcënon njerëzimin, njerëzimin i cili është bërë kërcënim për planetin dhe për vetë jetën e tij.