Ndodhi ajo që pritej, Gjykata Kushtetuese vendosi pro Thaçit. Një vendim i pritur marrë parasysh faktin se drejtësia është e kapur si shumë segmente të tjera të shoqërisë . Pa dashur të futem në çështje Kushtetuese dhe se a kanë vepruar drejt apo jo gjykatësit në rastin konkret, arsyeja për të dyshuar janë të mëdha. Pikërisht dështimi në sistemin e drejtësisë ka krijuar edhe Gjykatën Speciale, sepse drejtë si ka qenë nën diktatin e politikës, dhe këtë e dinë edhe zogjtë e malit. Prandaj, edhe na lind e drejta të paragjykojmë se gjykatësit në këtë rast kanë qenë të anshëm, megjithëse ligjërisht edhe janë në rregull, pasi hapësira e interpretimit Kushtetues ua mundëson që të interpretojnë sipas “dëshirës”, marr parasysh vakumin ekzistues në rastin konkret.
Pas këtij vendi pritet që Avdullah Hoti të jetë kryeministër. Dulla, edhe mund të ketë vullnet dhe dëshirë për të qeverisur mirë, kjo mbetet për tu parë në të ardhmen, tani është herët për të dhënë vlerësim se si do të qeverisë z.Hoti. Shqetësimi im, dhe besoj i shumë qytetarëve të këtij vendi, ka të bëjë me partnerët e koalicionit: AAK dhe NISMA. Këto dy parti ishin në pushtet deri në shkurt të këtij viti, nuk janë shquar për qeverisje të mirë. Për më tepër, kane qenë të përfshirë në shumë afera korruptive, kujtojmë këtu skandalin 53 milionë euro. Pastaj punësimet familjare, janë edhe arsyeja që NISMA falë AKR dhe 200 votave të fundit arriti të futet në Kuvend. Një parti që është ndëshkuar nga qytetarët pikërisht se ka qenë pjesë e shumë afera korruptive, duke përfshirë këtu edhe vet kreun e kësaj partie. Të gjithë ata që janë të shqetësuar me aleatët e z.Hoti në qeverisjen e ardhshme janë të drejtë, pikërisht nga përvoja e para pak muajve. Janë po të njëjtit njerëz, me të njëjtën mendësi, dhe nga njerëz të njëjtë të presësh rezultate të ndryshme në një lojë të njëjtë, është idiotizëm.
Edhe në raport me bisedimet me Serbinë, shqetësimi është i madh, se mos z.Hoti do të shndërrohet në kukull të Hashim Thaçit, që ka qëllim të përfitojë amnisti, pikërisht nga Serbia.
Nëse z.Hoti arrin të shpëtojë ndarjen e Kosovës, duke e shpëtuar atë nga kthetrat e Thaçit dhe atyre që duan ndarjen e saj, si dhe po arriti të tregohet i rreptë ndaj korrupsionit dhe keqqeverisjes, atëherë pa përjashtim do i apllaudojmë. Edhe pse dua të ndodh kjo gjë, arsyet për të dyshuar janë reale, marrë parasysh se pjesë e qeverisë do të jenë ata që populli i quan “hajna”.