Me notë 6.8 zv.ministër, me notë 9 kamarier, kjo është Kosova - Bota Sot
Me notë 6.8 zv.ministër, me notë 9 kamarier, kjo është Kosova

Opinione

Me notë 6.8 zv.ministër, me notë 9 kamarier, kjo është Kosova

Faton Mehmeti Nga Faton Mehmeti Më 24 qershor 2020 Në ora: 14:20
Ramush Haradinaj dhe Driton Bardheci

Emërimet e fundit në qeverinë Hoti lënë shumë për të dëshiruar. Njerëz pa përgatitje profesionale, militantët e partive në koalicion, sidomos nga AAK dhe NISMA. Në mungesë të kuadrove këto parti dërgojnë njerëz kundër marrëveshjes së koalicionit, duke e shkelur atë më të dyjave këmbët. Të kujtojmë se në marrëveshjen 14-pikëshe të koalicionit të lidhur mes AAK-së dhe LDK-së më 29 prill, konkretisht tek pika 9 e marrëveshjes saktësohet dhe specifikon se në pozita të kabinetit qeveritar, duhet të përcaktohen persona të cilët kanë kompetencë të lartë profesionale.

LDK dhe AAK pajtohen që në kabinetin qeveritar, të caktojnë persona me kompetencë të lartë profesionale, pastërti të figurës, të mos kenë dhe të mos kenë pasur probleme me ligjin, si dhe të kenë vullnet për punë ekipore”, thuhet në pikën 9 të kësaj marrëveshjeje. Kjo pikë tashmë nuk është shkelur,. Kujtojmë rastin e fundit të emërimit të Driton Bardhecit të AAK-së, që është punësuar dje si zëvendësministër i Arsimit. Dritoni një student i padiplomuar, ndonëse student me notë mesatare 6.8 nuk shquhet për ndonjë avancim të madh, përpos aktiviteteve partiake.

Pas këtyre emërime reagoi edhe Ambasada Amerike, e cila bëri thirrje që mos të emërohen militantë nëpër pozita të rëndësishme, por njerëz të kualifikuar. Duhet të mjaftonte kjo shkelje e marrëveshjes që kryeministri Hoti të refuzonte emërimin e këtyre personave, militantëve të pakualifikuar. Kemi edhe raste të tjera të emërimeve si ajo e ministres së jashtme e dënuar nga Gjykata me 8 muaj burg me kusht, që sipas marrëveshjes mes LDK dhe AAK e përjashtonte nga emërimi.

Tashmë kjo marrëveshje ekziston vetëm në letër, duke dëshpëruar të gjithë njerëzit që kanë nota të larta, e të cilët synojnë që t’i shërbejnë vendit. Fatkeqësisht njerëz që kanë mbaruar jo vetëm fakultetin, por edhe masterin, edhe me notë të larta, disa edhe me 9 sot punojnë kamarier. Mesazhet dekurajuese që po përçojnë këto emërime tek qytetarët, duhet të jenë shqetësim për kryeministrin, ndryshe nuk është në nivelin e detyrës, për të cilën edhe është zotuar. Kryeministër zbato atë që ke deklaruar, mos prano emërime të tilla.

Shfaq komentet
comments powered by Disqus
Sot mund të lexoni Shfletoni kopertinat