Taktika mashtruese: Pranoni ndarjen ose shtet serb brenda Kosovës!

Opinione

Taktika mashtruese: Pranoni ndarjen ose shtet serb brenda Kosovës!

Nga: Enver Bytyçi Më: 1 dhjetor 2022 Në ora: 21:10
Autori Enver Bytyçi

Zëra të caktuar bëjnë me dije nën zë se Rama dhe Thaçi e kanë certifikuar një marrëveshje me Vuçiqin për ndarjen e Kosovës. Mund të jetë fak-neës. Megjithatë unë prirem të besoj se këta të tre katër vite më parë kanë dhënë verdiktin e tyre për shkëmbimin e territoreve. Ky fakt ka filluar të artikulohet nga përkrahësit e ndarjes së Kosovës si triumf i asaj politike, kur thonë se „Nuk deshët korrigjimin e kufijve, tani pranoni shtetin serb brenda Kosovës“! Dhe kanë parasysh me këtë krijimin e Anotacionit të Komunave me Shumicë Serbe!

Ndërkaq në tregun mediatik përkrahësit e idesë së ndryshimit të kufijve kanë nis të merren me “argumentet” në terren. Këta njerëz publikë, politikanë e gjithçka tjetër, po na thonë se: “Nuk ka kurrgjë prej Mitrovicës së Veriut”! “Trepça ka mbaruar tashmë rezervat e saj”! Linjiti dhe mineralet e tjera në veri janë të varfra dhe askush nuk ka interes të investojë aty”! Madje shkojnë deri te konstatimi fals se “Në komunat e veriut të Kosovës 99.99 për qind e popullsisë është serbe“, duke shtrembëruar realitetin demografik të këtyre katër komunave. Dhe jo vetëm kaq! Edhe duke legjitimuar spastrimin etnik të shqiptarëve të vitit 1999 në veri të Kosovë. E ndërkohë Serbia nuk le rast pa kërkuar kthimin e serbëve në Kosovë, duke pretenduar se para luftës aty jetonin jo më pak se 300 mijë serbë”, kur regjistrimet e Milosheviçit kishin shënuar shifrën e 210 mijë serbëve në Kosovë!

Serbofilët

Politikanë e njerëz të tjerë me ndikim publik me emra shqiptarësh, në vend që t’i kundërvihen politikave serbe të dominimit në rajon e serbizimit të Kosovës, janë bërë palë me Beogradin për të argumentuar “të drejtën serbe në Kosovë”! Është e trishtë, por dëgjon edhe pohime të tilla si: “Ashtu si u trajtuan shqiptarët nga Milosheviçi, ashtu po trajtohen edhe serbët në Kosovë nga ana e qeverisë Kurti”! Dhe pas këtij pohimi vjen arsyetimi se “këta serbë duhet të kenë të drejtën e vetëvendosjes, njësoj si edhe shqiptarët”! Kurse këtyre politikanëve shqiptarë serbofilë nuk u shkoi asnjëherë mendja se 700 mijë shqiptarë në Maqedoninë e Veriut nuk e kanë të drejtën e vetëvendosjes. Ndërsa e kërkojnë këtë të drejtë për 30-35 mijë serbë të veriut të Kosovës, nuk e artikulojnë këtë për 300-400 mijë hungarezë të Vojvodinës, për rreth 200 mijë myslimanë e shqiptarë të Sanxhakut apo për 125 mijë shqiptarët e Luginës së Preshevës.

Shqiptarët tanë i janë bashkuar kështu konceptit serb si “popull i zgjedhur”! Sepse nëse 30 mijë serbë të katër komunave kërkojnë vetëvendosje, ndërkohë që kjo u mohohet nacionaliteteve të tjera me 20 herë më shumë në numër, atëherë do të thotë se popujt e Ballkanit nuk trajtohen në mënyrë të barabartë! Kryetrimi i këtyre akteve anti-shqiptare është kryeministri i Shqipërisë, Edi Rama! Ai e nisi mbështetjen e tij në krah të “popullit të zgjedhur serb” dhe e trajton gjithashtu shtetin e Serbisë si “shtet të zgjedhur”, me të drejtën “e ligjshme” për ta sunduar dhe dominuar skenën politike, jetën ekonomike, kulturore dhe sociale në Ballkanin Perëndimor!

Alternativa e Edi Ramës, Hashim Thaçit, Aleksandër Vuçiqit është “Ose ndajeni Kosovën dhe pasuritë e saj jepjani Serbisë, ose pranoni sundimin e Serbisë në rajon”! Kjo alternativë në Kosovë përkthehet: “Ose pranoni ndarjen, ose Open Balkan-in dhe Asociacionin”!

Një lidhje “ilire”

Kishim menduar se ndarja e Kosovës ishte arkivuar. Po ashtu po besojmë se Open Balkan është tashmë në arkivol. Por, UDB-ashët dhe Çetnikët serbë nuk tërhiqen. Ata po krijojnë narrativen dy degësh: - Ndarje e Kosovës ose Open Balkan e Asociacion. Ata që i kundërshtojnë këto dy trysni të grupimeve pro-serbe në Shqipëri, Kosovë, Maqedoninë Perëndimore, Mal të Zi e kudo ndoshta është mirë të mendojnë për krijimin e një Asociacioni të ri: - Lidhja e përbashkët Kroaci-Bosnjë-Hercegovinë- Mali i Zi – Shqipëri – Kosovë e Maqedoni e Veriut.

Kjo lidhje e re mund të qëndrojë e hapur edhe për Serbinë, por me kusht që ajo të kërkojë ndjesë për të gjitha krimet e tmerrshme gjenocidale kundër popujve të tjerë dhe të shkëputet realisht nga aleanca me Rusinë! Kjo do të thotë që krahas ndjesës, të pranojë realitetin e shteteve që kanë dalë nga ish-Jugosllavia dhe të bëhet anëtare e NATO-s!

Nëse iniciohet një lidhje me kryeqytetet Zagreb-Sarajevë-Podgoricë-Tiranë-Prishtinë e Shkup, atëherë Serbia izolohet plotësisht dhe nuk do të ketë as alternativë, as mundësi praktike të kërcënojë paqen, stabilitetin dhe sigurinë e Gadishullit Ballkanik. Vjosa Osmani e Albin Kurti së bashku me presidentin dhe kryeministrin kroat duhet medoemos të nisin bisedimet për një lidhje si kjo. Ndryshe do të gjenden nën trysninë e alternativës së Vuçiqit dhe Edi Ramës “Ose ndarja e Kosovës, ose shtet serb brenda Kosovës”! Jam i bindur se Gjukanoviç do të jetë pro kësaj nisme.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat