Për Evropën e kemi ditur që nuk na do dhe asnjë veprim i saj nuk na befason, por nuk e kemi besuar asnjëherë, që do të vjen dita kur edhe SHBA -ja do ta përkrahë Serbinë më shumë sesa ne shqiptarëve, popullin më pro-amerikan në rruzullin tokësorë!
BE vazhdimësi e Evropës plakë, SHBA-të befasi!
Bashkësia ndërkombëtare në përgjithësi dhe BE-ja në veçanti po i përdorë territoret shqiptare për llogaritë e saja sikurse centët për kusuritje me Serbinë. Përkrahja dhe ledhatimet e disa shteteve perëndimore ndaj Serbisë po bëhen me shpresën se mund ta largojnë atë nga Rusia!
Kurse me ne shqiptarët po luajnë paturpësisht në stilin; “hip se të vrava, zbrit se të mbyta krejt”! “Merre ose lëre” ishte oferta e fundit ndaj Kosovës në dialogun e Brukselit më 27 Shkurt 2023! E kjo për një popull të varur skajshmërish do të thotë kushtëzim i dhimbshëm dhe i dhunshëm.
Ndërrimi i qasjes së SHBA-ve ndaj Kosovës nuk është i ditëve të sotme, por nga qeverisja e Barack Obames e këndej. Dihet mirëfilli se në Marrëveshjen e 4 Shtatorit 2020 në Ëashington me kërkesën e Serbisë dhe insistimin e SHBA-ve u largua pika e 10 e marrëveshjes e cila e parashihte njohjen reciproke.
Kurse sot klasa jonë politike (deputetët) duke i shfryrë inatet personale, me sharje e fyerje ndaj njëri-tjetrit po i akuzojnë edhe diplomatet amerikan, siç thoshin më parë, fajet i ka Grenelli, tash Escobari e kështu më radhë, duke menduar se politika amerikane është sikurse politika ballkanike që ndryshon siç ndryshon moti (koha) dhe as qe po mendojnë se ka ndryshuar komplet qasja amerikane ndaj Kosovës!
Ndërrimi i qasjes amerikane në Ballkan
Çështja e Kosovës është dashur të përmbyllet menjëherë pas luftës apo tre vjet më pas siç i ishte premtuar në Rambuje, për organizimin e Referendumit për deklarimin e popullit në mënyrë plebishitare për organizimin politik dhe territorial, se kah duan të shkojnë!?
Mirëpo “hekuri nuk rreh sa ishte i nxehtë” dhe gjithçka ka ndryshuar!
Para 24 viteve aleanca më e fuqishme ushtarake në botë-NATO i mbrojti shqiptarët nga shfarosja, kurse 24 vite më pas ata po e ndihmojnë Serbinë. Fajtore për këtë ndërrim të qasjes amerikane në Ballkan nuk është Serbia, por janë egot e pakufishme të politikanëve për pushtet në këtë gjysmë shtet.
Kemi ndryshuar ne, por ka ndryshuar edhe situata gjeostrategjike në Evropë!
Erërat e luftës në Ukrainë po fryjnë edhe në Ballkan.
Fillimi i një lufte eventuale në Ballkan do të ishte fatale për shqiptarët.
Koincidencë apo skenar i përgatitur, kriza gjeopolitike evropiane përsëri po lidhet me fatin tonë.
Fati ynë është i lidhur ngushtë me interesat amerikane në Ballkan! Zoti është në qiell dhe Amerika në tokë. Aleatë tjetër më të besueshëm nuk kemi, prandaj duhet të jemi tejet të kujdesshëm në qasjen tonë ndaj Amerikës dhe tepër të vëmendshëm në përafrimet tona me shtetet anti-amerikane.
Sot ndodhemi mes dritës dhe errësirës, mes lindjes dhe perëndimit, mes fundosjes dhe shpëtimit. Lutja ime për fund do të ishte kjo, o Zot shpëtoje vendin tim, shpëtoje Republikën e Kosovës nga zhbërja fizike dhe asimilimi etnik.
