Pavarësia dhe dilemat e saj - Bota Sot
Pavarësia dhe dilemat e saj

Opinione

Pavarësia dhe dilemat e saj

Nga: Florim Zeqa Më: 17 shkurt 2013 Në ora: 13:03

Në përvjetorin e pestë të shpalljes së pavarësisë, të njohjes ndërkombëtare të Kosovës, qytetaret urojnë njëri-tjetrin me ndjenja të përziera. Krahas urimit nderojnë e kujtojnë të gjithë dëshmoret e martirët, nderojnë rezistencën e sakrificën e shumë brezave, por në mënyrë të veçantë kujtojnë sakrificën sublime të familjes Jashari.
Gjatë intonimit të himnit, heshtës pa tekst, shqiptarët me nostalgji të madhe kujtojnë e nderojnë liderin shpirtëror, arkitektin e shtetit të Kosovës, presidentin historik Ibrahim Rugovën, duke kënduar nën tingujt e zemrës himnin e shtetit të tyre; "Kur ka ra kushtrimi n'Kosovë", dhe me ndjenjë të veçantë e imagjinojnë valëvitjen e flamurit Dardan në vend të këtij lara-lara.
Si në çdo përvjetor të shtetit të Kosovës, edhe kësaj radhe qytetarët do të kthejnë kujtesën e tyre në vitet e krenarisë kombëtare, në vitet e '90-ta, kur në Kosovë sundonin vlerat, dominonte morali i pastër njerëzorë, kur durimi rugovian sfidonte dhunën serbe, solidariteti fitonte ndaj varfërisë, e mira ndaj të keqes.
Pushteti moral dhe funksionimi i shtetit paralel janë produkt i atdhedashurisë së pa fundme dhe vlerave shqiptare si: besa, humanizmi, dashuria, respekti ndaj njëri-tjetrit,...e shumë traditave të bukura kombëtare.
Republika e Kosovës, në mendjet e zemrat e shqiptarëve ekziston që nga 2 korriku i vitit '90, kur deputetët shqiptar shpallën Kosovën njësi të pavarur e të barabartë më republikat tjera të ishë federatës Jugosllave.
Njohja formale e pavarësisë së Kosovës ishte kërkesë e vazhdueshme e presidentit historik Ibrahim Rugova, e cila u bë realitet më 17 shkurt 2008-të, kur bashkësia ndërkombëtare Kosovës i dha sinjalin për njohjen e saj shtet të pavarur e sovran.
Ekzistonte bindja e përgjithshme qytetare se pas aktit të (ri)shpalljes së pavarësisë, të njohjes ndërkombëtare të saj, gjërat do të marrin të mbarën siç është; zhvillimi ekonomik, hapje e vendeve të punës, për rritje të mirëqenies qytetare, ulje të varfërisë, sundim të ligjit dhe prosperitet në të gjitha lamitë e jetës.
Jo vetëm që nuk u realizuan këto pritje, mirëpo edhe pesë vite prapa, Kosova gjendet ende larg shtetit të dëshiruar.
Për arsye se pavarësia nuk erdhi e plotë dhe u dëmtua rëndë gjatë dy viteve të fundit përmes procesit të bisedimeve "teknike" e politike me Serbinë,...kualiteti i ulët i pavarësisë dhe largimi i lidershipit aktual nga vlerat kombëtare ka bërë që identiteti i shtetit të tjetërsohet nga një shtet etnik (mbi 92% shqiptar) në një shtet "multietnik" (të pakicave).
Për qytetarët e pjesës veriore të Kosovës edhe në ketë pesëvjetor, pavarësia vazhdon të mbetët vetëm një ëndërr e pa realizuar.
Ndërsa për të harruarit nga shteti; të varfrit, invalidët e luftës dhe familjet e dëshmorëve është thyerje e madhe shpirtërore kur shohin pasurimin e "komandantëve" dhe "emisarëve politikë" të luftës çlirimtare.
Barrikadimi i pjesës veriore nga ana e serbëve është rezultat i dialogut "teknik", ndërsa lënia në harresë e Kosovës Lindore nga qeveritaret e Kosovës është fryt i dialogut politik.
Përderisa autonomia e komunave serbe në brendinë e vendit (decentralizimi etnik), dhënia e pronave të shqiptarëve kishave serbe (metohija) është realizim i planit të Ahtisarit dhe Ban Kimunit për shtrirjen gjeografike të serbëve në Kosovë. Kurse shitja e pronave publike kompanive te huaja (turke) ndihmon humbjen e pronësisë së shtetit mbi pasuritë e vendit.
Të gjitha këto së bashku kanë ndikuar në uljen kualitetit të shtetit, duke krijuar kështu dilemën e madhe se a është Kosova e pavarur apo jo?
Heqja e një kolonializmi (nga Serbia), dhe futja nën një tjetër (nën tutelën e BE-së), jo vetëm që nuk është pavarësi,...është varësi akoma më e madhe nga e cila vështirë do të dilet !
Mungesa e zhvillimit ekonomik, mungesa e ushtrisë si element i sigurisë së vendit (KFOR-i), sistemi i drejtësisë në duart e ndërkombëtarëve (EULEX-i) dhe mungesa e sovranitetit, janë elemente të mjaftueshme që tregojnë varësinë ekstreme të shtetit të Kosovës ndaj faktorëve ndërkombëtar (SHBA dhe BE).

Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...