Me firmën e kryeministrit Rama është marrë vendimi pa zhurmë e bujë më 13 dhjetor 2017 dhe me zbatimin e tij janë ngarkuar prefektët. Ekspertë nga Greqia do të punojnë bashkë ekspertët shqiptarë për zhvarrosjen dhe identifikimin e eshtrave. Po ashtu, më 28 tetor, grekët e rënë do të përkujtohen me ceremoni shtetërore shqiptare si festë zyrtare.
E pra, kjo shpjegon më së miri dekorimin e Ramës me Kryqin e Kalorësit të Orthodoksisë greke. Por, Edi Rama për mua është lepurush, një frikacak që trembet nga hija e tij.
Më 13 Dhjetor 2015, kryeministri Edi Rama i shoqëruar nga disa ministra të besueshëm që i fyen ditë e natë, që nuk bëjnë zë, bëri një vizitë në Jeruzalem dhe gjatë kësaj vizitë ata u ndalën në Patriarkanën e Kishës Ortodokse Greke. Kryeministri Rama u betua si Kalorës i Kryqit të Madh të Urdhërit të Kalorësve të Varrit të Shenjtë. Ky titull u jepet personaliteteve të Greqisë me kombësi greke të besimit ortodoks. Në raste të veçanta u jepet edhe personaliteteve me kombësi jo greke që kanë dhënë një kontribut të çmuar për ortodoksinë greke.
Betimi i Edi Ramës për besnikëri ndaj Greqisë më 13 dhjetor 2015 para Partiarkut grek të Jeruzalemit, pas dy vitesh, më 13 dhjetor 2017 jep frutin e saj me nënshkrimin ndërtimit të rreth 8.000 varreve të ushtarëve grekë. Rastësi apo konspiracion?
Në fjalime jemi mësuar që Ramën ta dëgjojmë tek i kapardiset Greqisë, por dhënia e këtij Urdhëri e vë atë në rresht në veprimtarinë politike dhe shoqërore. Në fakt, “sulltani” i qeverisë sonë i ka të thella rrënjët e “dashurisë” me fqinjët, përderisa vite më parë është financuar nga Fondacioni i Greqisë të Sokratis Kokkalis.
Marrja e këtij Urdhëri të Ortodoksisë Greke në atë kohë nuk iu bë me dije publikut të gjerë, por u mbajt i fshehtë. Askush nuk e shpjegon përse gjithë kjo fshehtësi nga Edi Rama?
Dhe ja ku na del që jo rastësisht kryeministri Rama i dekoruar me urdhërin e lartë të ortodoksisë greke, hedh firmën në këtë vendime antishqiptare, duke urdhëruar disa ministri për ndërtimin e rreth 8.000 varreve bosh të ushtrisë së vdekur greke.
Greqia gjithnjë ka kërkuar ndërtimin e rreth 8.000 varreve të ushtarëve grekë “të rënë” gjatë luftës italo-greke 1940-1941. Çështja është se kush na vërteton që në Shqipëri janë vrarë rreth 8.000 grekë dhe ku gjenden eshtrat e tyre?
Në varrezat e Këlcyrës ka rreth 350 varre bosh që presin të mbushen me eshtrat e shqiptarëve që do vdesin që po ua blejnë kockat me para në dorë.
Nënshkrimi i marrëveshjes mes Shqipërisë dhe Greqisë për ndërtimin e varrezave të ushtarëve grekë në vendin tonë tregoi edhe njëherë se politikanët, ministrat, deputetët shqiptarë u gjunjëzuan përpara presioneve greke për disa varre. Sot, ndërtimi i këtyre varrezave na duket si diçka normale, por grekët ia kanë daqlë të ngrejnë tezën për edukimin e brezave të ardhshëm se Shqipëria ka pushtuar Vorio Epirin (jugu i Shqipërisë) në luftën italo-greke. Të gjithë e dimë që po realizohen skenarë të tillë dhe heshtim, heshtim përpara tragjedisë që po na troket në derë.
Nënshkrimi i marrëveshjes mes Shqipërisë dhe Greqisë për ndërtimin e varrezave të ushtarëve grekë në vendin tonë ishte vënë si kusht për ratifikimit nga ana e Kuvendit të Republikës Greke të MSA-së mes Shqipërisë dhe Bashkimit Europian. Kushtin për bllokimin e MSA-së, për shkak të ndërtimit të varrezave e deklaroi atë periudhë edhe nënkryetari i Kuvendit të Greqisë, Jorgos Surlas.
Varret e ushtarëve grekë do të shfrytëzohen për aneksimin e jugut të Shqipërisë. Përherë oficerë-ushtarakë të qytetit të Ksanthit në Greqi, organizojnë pelegrinazhe në Shqipërinë e Jugut duke vizituar Përmetin, Himarën, Sarandën, Tepelenën, Gjirokastrën. Ata vizitojnë varret bosh të ushtarëve grekë “të rënë” gjatë luftës italo-greke 1940-‘41
Gjatë vizitës të këtyre mysafirëve që kanë grada ushtarake, ngrihet flamuri i aneksimit të jugut të Shqipërisë-Autonomia e Vorio Epirit, ku tashmë janë vendosur pllakata përkujtimore në gjuhën greke në territorin e Republikës së Shqipërisë.
