Qëndrimi prej struci i deputetëve të Kuvendit të Kosovës karshi aventurave të rrezikshme të presidenti Thaçi për dialogun me Serbin, nuk mund assesi të mos dënohet, më e pakta të kritikohet.
Përfaqësuesit e popullit nuk duhet të ndjehen komod, të pushojnë dhe të argëtohen në kohën kur presidenti i papërgjegjshëm i shtetit po i nëpërkëmb kompetencat e Kuvendit të Kosovës, Qeverisë dhe po e shkel kushtetutën e Kosovës. Nuk duhet të tregohen indiferent karshi presidentit Thaqi, i cili kokë në vete po tenton të realizoj disa agjenda të rrezikshme dhe me shumë të panjohura!
Asgjë të sigurt nuk ka se, cila do jetë tema e takimit Thaçi-Vuçiç, në shtator. Kush garanton se, Thaçi do bisedoj për “korrigjim” të kufijve? Kush e ndalon Thaçin për të biseduar krejtësisht temat tjera, ndryshe nga ato që i ka bërë publike?
Thaçi evoluon në qëndrimet e tija ma shpejtë se uji që shndërrohet në oksigjen. Kjo nuk është rastësi. Së pari shkakton konfuzion në opinion, pastaj në fund del me një ide krejtësisht tjetër, të cilën askush nga publiku nuk e ka dëgjuar më parë. Krejt këtë lojë e bën për të shkaktuar efektin e befasisë së masës. Është taktik e “gjarprit”.
Qytetarët kanë të drejtë të shqetësohen sepse agjenda e Thaçit fsheh përbrenda shumë të panjohura, shumë të pa pritura dhe shumë të pa thëna, që Thaçin e bënë të rrezikshëm.
Përfaqësuesit e popullit nuk duhet të vet mjaftohen dhe të shfajësohen pse presidenti po i shpërfill thirrjet e tyre. Këto sjellje i ngjajnë zërave të kukuvajkës.
Qytetarët e Kosovës janë lodhur nga kukatjet e deputetëve. Ata kanë nevojë për një fluturim shqiponje.
Thaçi vet nuk ndalet, pa e ndal dikush.
Veprimet e presidentit Thaçi nuk duhet të kuptohen vetëm si probleme i partive opozitare. Po flasim për veprime që prekin Kuvendin e Kosovës si organ legjislativ. Të gjithë deputetët e Kuvendit të Kosovës njëzëri duhet të mbrojnë parimin kushtetues, të ndarjes së pushteteve në Kosovë, të cilin po e cenon rënd presidenti Thaçi, i cili pa kompetencë kushtetuese dhe autorizim politik nga Kuvendi i Kosovës po zhvillon bisedime me Serbin.
Për ta ndal turra vrapin e presidentit Thaçi, mjafton pajtimi i deputetëve nga radhët e LDK-së, LVV-së, PSD-së dhe NISMAS, të cilët mund të arrijnë, tre gjëra për ta ndalur Thaçin .
E para. Së paku të pajtohen që të nxjerrin një rezolutë të Kuvendit, me të cilin e vënë në dije Bashkimin Evropian dhe faktorin ndërkombëtar, se presidenti Thaçi nuk ka autorizim politik e kushtetues, që në emër të shtetit të Kosovës të zhvilloj bisedime me Serbin, dhe as me nënshkruar kurrfarë marrëveshje. Çfarëdo marrëveshje e arritur në mes presidentit Thaçi dhe presidentit Vuçiç , të konsiderohet jo legjitime dhe e pa vlefshme .
E dyta. Nëse Kryeministri Haradinaj nuk është i gatshëm që të udhëheqës bisedimet me Serbinë ndërsa Kuvendi i Kosovës e vlerëson si tepër domethënëse faktin se, dikush nga Qeveria e Kosovës duhet t’i udhëheqë bisedimet, atëherë deputetët e Kuvendit të Kosovës me shumicë mund ta nominoj zëvendës Kryeministrin Fatmir Limaj, i cili potencialisht paraqet përfaqësues të denjë të Kosovës në ato bisedime. Kjo do ta ndal Thaçin për të udhëhequr negociatat sepse është në pajtim me Kushtetutën dhe me kërkesën e zyrtarëve të BE-së, që formati i bisedimeve të jetë një me një.
E treta. Deputetët shumicë të Kuvendit të Kosovës duhet ta formojnë grupin negociator të unitetit, ku secila parti politike do përfaqësohet ndërsa kryesuesi i grupit do jetë pikë kontaktimi për bisedimet me Serbin nga palët e kyçura në atë proces. Pastaj edhe platforma të hartohet.
Një praktik të tillë e kemi ndjekur edhe ma herët si Kosovë, prandaj nuk duhet humbur kohë me obstruksionet politike me lyp kreativitet të reja, sepse do të rezultojnë me pasoja politike të pa riparueshme për shtetin e Kosovës.
Thaçi nuk ndalet nga Rezolutat e Kuvendi të Kosovës, të cilët i drejtohen atij. Do i konsideroj si jo obliguese, do t’i injoroj ato rezoluta, dhe do vazhdoj të takohet me Vuçiçin në shtator. BE-ja do vazhdoj t’i mbyll sytë para kësaj situate, duke u arsyetuar se nuk kanë marrë asnjë dokument zyrtar nga Kuvendi i Kosovës, që informon se kush do e përfaqësoj Kosovën në bisedime.
Legjitimiteti për udhëheqjen e bisedimeve me Serbin është në Kuvend të Kosovës, prandaj deputetët duhet ta shfrytëzojnë sa më parë këtë autorizim kushtetues dhe qytetarë.
Humbja e kohës nga deputetët e Kosovës po tensionon gjendjen politike dhe sociale në Kosovë dhe rajon, me rrezik të përshkallëzimit dhe shpërthimit qytetar.
Të ndërpriten obstruksionet e opozitës për ardhje në pushtet.
Patit politike opozitare duhet të shmangen nga kalkulimet politike, se si të vinë në pushtet, në kohën kur ekziston një interes tjetër politik më i madh, se sa ardhja e tyre në pushtet.
Nuk është koha për të menduar për rrëzimin e Qeverisë së Kosovës ndërkohë që rrezikun më të madh për interes e Kosovës po paraqet presidenti Thaqi, i cili mjeshtërisht po shfrytëzon kacafytjet e partive politike për pushtet, për t’i shtyrë tutje agjendat e tija personale, të cilat janë të gatuar jashtë Kosovës dhe sipas recetës ruse-serbe.
Disa parti politike në Kuvendin e Kosovës po mendojnë, apo edhe e kanë menduar, që duke heshtur dhe duke mos vepruar për ta ndalur presidentin Thaçi në zhvillimin e bisedimeve me Serbin, ta heqin barrën e zgjidhjes së çështjes së veriut të Kosovës, duke ia lënë duart e lira Thaçit që ta zgjedh sipas mënyrës së tij.
Kështu që ma vonë këto parti politika të kenë argumente për ta akuzuar Thaçin se, nuk e ka zgjidh drejtë çështjen e veriut të Kosovës dhe e ka dëmtuar interesin e Kosovës në bisedime.
Kjo mënyrë e sjelljes së përfaqësuesve të popullit dhe partive parlamentare është qyqarllëk. Është sjellje më e ulët njerëzore. Të mbyllësh sytë para rrezikut që i kanoset shtetit dhe qytetarëve, është dezertim nga akti i daljes zotë vendit tënd, popullit tënd. Është tradhti e akëcilit deputet të Kosovës nëse nuk vepron për ta ndalur Thaçin, sepse do të shkelin betimin e dhënë publik në kohën kur e ka marr detyrën, dhe kur është zotuar se: Do ta mbroj kushtetutën, shtetin dhe interesin e qytetarëve.
Të heshtësh në kohën kur duhet ngritur zërin dhe të veprosh, është pajtim me nënshtrimin.
Heshtja e përfaqësuesve të popullit para aventurave të rrezikshme të presidentit Thaçi është krim politik, deputet!