Presidenti i Kosovës, Hashim Thaçi, ka deklaruar se nënshkrimi i protokollit të anëtarësimit të Maqedonisë së Veriut në NATO është një fitore e vlerave perëndimore dhe përafrim i rajonit drejt integrimit euroatlantik.
Ai me këtë rast ka përgëzuar spektrin politik në Maqedoninë e Veriut për këtë të arritur, për të cilën tha se do të sjellë më shumë paqe, stabilitet dhe siguri në rajon.
Thaçi në postimin e tij në Facebook shkruan gjithashtu se marrëveshja gjithëpërfshirëse Kosovë-Serbi do të jetë hapi tjetër drejt përmbylljes së konflikteve në rajon dhe hapjes së rrugës drejt anëtarësimit në Kombet e Bashkuara, NATO dhe Bashkim Evropian.
Në lidhje me këtë njohësi i çështjeve politike profesor Sulejman Mahazi ka thënë për “Bota sot” se nënshkrim i protokollit të anëtarësimit të Maqedonisë Veriore në NATO është fitore e dy qeverive: e Maqedonisë Veriore dhe e Greqisë, e jo e Kryetarit të Maqedonisë Ivanovit.
Sipas tij, kjo fitore e vlerave euro-atlantike perëndimore e Maqedonisë për Hashim Thaçin më shumë le të bëhet shembull se gjatë dialogut me Serbinë të merr pjesë jo ai, po qeveria e Kosovës në krye me Haradinaj, njësoj sikurse mori pjesë kryeministri i Maqedonisë Zaevi me homologun e tij grekë.
“Suksesi i dialogut, i marrëveshjes së Maqedonisë me Greqinë s'ishin kryetarët e dy shteteve, por kryeministrat e dy qeverive. Urimi i Hashim Thaçit për anëtarësimin e Maqedonisë në NATO është i zbehtë sikurse i Ivanovit të Maqedonisë. Pse e themi këtë? E themi se pengesë kryesore e marrëveshjes Maqedoni-Greqi ishte Ivanovi, kurse në Kosovë, pengesë kryesore e dialogut me Serbinë është Thaçi për mos ndarjen e Kosovës, e jo qeveria e Kosovës, Pra, në Maqedoni pengesë e marrëveshjes me Greqinë ishte Kryetari Ivanovi, kurse në Kosovë pengesë kryesore e marrëveshjes me Serbinë është Thaçi për ndarjen e Kosovës”, ka thënë njohësi i çështjeve politike profesor Mehazi, duke shtuar se në Maqedoni kryetari Ivanov bën krye në vete, kurse në Kosovë Hashim Thaçi në dialog me Serbinë krye me vete.
