Kryetari i Komunës së Prishtinës dhe PSD-së, Shpend Ahmeti e ka paditur ish- partinë e tij, Lëvizjen Vetëvendosje për shpifjet e vazhdueshme që kjo parti i ka bërë në drejtim të tij.
“Ushtrova padi ndaj VV- së për shpifjet e vazhdueshme që i kanë bërë. Ka të bëj me qumështin nëpër shkollat e Prishtinës. Të gjitha këto furnizime që ata i kanë potencuar se janë bërë, kanë qenë edhe ata pjesë e atij procesi, sepse edhe unë kam qenë në VV”, tha Ahmeti.
“Me rëndësi janë sulmet e vazhdueshme duke shpifur e duke mos pasur asnjë konsideratë për të vërtetën. Do të ishte mirë që kjo padi të shkojë prapa njërit të cilit i bën të gjitha këto shpifje”, tha Ahmeti.
E pas kësaj, ka reaguar anëtari i Lëvizjes Vetëvendosje, Avni Zogiani.
Zogiani thotë se, pas asaj që ka dëgju nga Ahmeti nuk është problemi në faktin se a ka qenë tender i mbyllur apo jo, e kjo sipas Zogianit nuk është çështja kryesore, por çmimi i shumëfishtë për të njëjtin produkt dhe të njëjtën sasi.
Pas kësaj, Zogiani thotë se, Komuna e Prishtinës kanë pretenduar se është gjithçka në rregull, mirëpo pas argumenteve për çmimet e shpërputhura Komuna e ka anuluar tenderin.
Zogiani pyet se, pse u anulu tenderi, nëse gjithçka ka qenë në rregull?
Megjithatë, Zogiani shton se, po mos të reagonte LVV, ky tender do të vazhdonte pa asnjë problem.
“Problemi në argumentimin që e dëgjova pas dorëzimit të këtij rasti, qëndron në faktin se ai flet për atë se a ka qenë tenderi i mbyllur apo jo. Kjo nuk është çështja kryesore në këtë rast, por është çmimi i shumëfishtë për të njëjtin produkt dhe pak a shumë të njëjtën sasi. Fillimisht Komuna e Prishtinës dhe vetë Ahmeti kanë pretenduar se gjithçka është në rregull me këtë tender. Mirëpo, pasi kanë dalur argumentet dhe çmimet e shpërputhura, Komuna ka vendosur ta anulojë tenderin. Pse u anulua nëse gjithçka ka qenë në rregull? Pastaj, tenderi ka qenë në fazën e përmbylljes, dhe ka qenë e ditur kush do të jetë fituesi dhe me cilin çmim, kështu që anulimi në fakt është vetëm një reagim pasi janë gjetur manipulimet e dyshimta, kështu që ne sot mund të konsiderojmë se ky tender po të mos trajtohej nga LVV, do të vazhdonte pa asnjë problem”, thotë Zogiani për gazetën “Bota sot”.