Ish-agjenti i shërbimit sekret serb, Branislav Nikoliq, është emëruar këshilltar politik i presidentit të Kosovës, Hashim Thaçi.
Nikoliq, dhjetë vjet më parë, kishte punuar kundër Ushtrisë Çlirimtare të Kosovës.
Për këtë rast, është publikuar edhe video e cila ka shpërfaq Nikoliqin i cili ishte duke kryer misionin e tij të Beogradit në Kosovë.
Lidhur me këtë është deklaruar edhe Prof. Dr. Binak Maxharraj. Ai në një bisedë për gazetën “Bota sot”, duke e komentuar këtë rast, ka thënë se presidenti i vendit ka një histori të keqe.
Sipas Maxharraj, Thaçi erdhi me ndihmën e agjenturave të ndryshme franceze dhe serbo-ruse, por edhe të mbeturinave enveriste të tipit Nano-Klosi në pushtet, për atë siç thotë ai, për t’i “kryer detyrat”.
“Kur është në pyetje Hashim Thaçi çdo gjë është e mundur. Ky njeri e ka një histori të keqe, i cili jo vetëm që nuk luftoi, por me dredhi dhe me ndihmën e agjenturave të ndryshme franceze dhe serbo-ruse, por edhe të mbeturinave enveriste të tipit Nano-Klosi erdhi në pushtet për t’i “kryer detyrat”, që këto agjentura ia kishin dhënë t’ua realizoi, e njëra ndër këto është edhe futja e agjenti të BIA-s në Presidencë”, thotë Maxharraj.
Mes tjerash Maxharraj, shpjegon se Thaçi është i kapur nga këto agjenci spiunazhi, të cilët për krimet gjatë luftës dhe pasluftës i kanë hap dosje të rënda.
“Mirëpo, kush e bënë një gjë të këtillë, askush pos një i krisur, një që është i kapur nga këto agjenci spiunazhi, të cilët për krimet gjatë luftës dhe pasluftës i kanë hap dosje të rënda dhe është zënë rob nga to”, ka thënë mes tjerash në këtë bisedë, prof.dr. Binak Maxharraj.
Presidenti i Kosovës, Hashim Thaçi ka shkarkuar nga detyra këshilltarin e tij Branisllav Nikoliq i cili nga mediat është raportuar se ka qenë agjent i shërbimit sekret të Serbisë(BIA).
Në lidhje me këtë nga Presidenca ka lëshuar një deklaratë për media.
“Zyra e Presidentit të Kosovës konfirmon se nuk ka pasur asnjë informacion paraprak dhe zyrtar nga institucionet e sigurisë në Kosovë për përfshirjen e mundshme të Branisllav Nikoliq në aktivitete të dyshimta, për të cilat është raportuar në media.
Përkundër kësaj, Zyra e Presidentit i merr seriozisht raportimet e medieve për përfshirjen e mundshme Nikoliq në aktivitete të dyshimta, qofshin ato të natyrës kriminale ose që cenojnë sigurinë kombëtare”, thuhet ndër të tjerash në këtë komunikatë.