Javën e kaluar në Berlin të Gjermanisë u mbajt një takim sekret në mes të palës nga Kosova dhe asaj të Serbisë.
E për një takim të tillë, presidenti i vendit, Hashim Thaçi ka kritikuar kryeministrin Ramush Haradinaj.
Pas kësaj, kryetari i Prishtinës, Shpend Ahmeti, ka kritikuar presidentin Thaçi, derisa i ka thënë se ai është takuar vetë me presidentin serbe fshehurazi dhe nuk mund ta kritikojë askënd.
Lidhur me këtë, zyrtari i LDK-së, Bajram Gecaj, ka thënë për gazetën “Bota sot” se institucionet e Kosovës janë okupuar nga individë të cilët qëllimin e fundit e kanë interesin kombëtar e shtetëror, duke bërë gjithçka që të mbesin në pushtet.
“Fatkeqësisht, institucionet e Kosovës janë okupuar nga individë të cilët qëllimin e fundit e kanë interesin kombëtar e shtetëror. E gjitha që e bëjnë është me qëllim të mbetjes në pushtet, trashjes së dhjamit dhe shtyrjes para të interesave individuale, grupore e klanore. Shtyhen si të ishin adoleshent, ndërsa pastaj e bëjnë të njëjtën edhe vetë”, është shprehur ai.
Sipas Gecajt, takimet sekrete me Serbinë dhe ato të brendshme kanë për qëllim ruajtjen e pushtetit, duke harruar interesin e qytetarëve.
“Takime sekrete ka me Serbinë, pjesë të komunitetit ndërkombëtar, por edhe një mal takimesh sekrete të brendshme, të cilat së bashku lidhen tek ruajtja e pushtetit me çdo kusht. Interesin e qytetareve e kanë harruar fare, madje madje unë nuk jam i sigurt nëse vërtetë ndonjëherë edhe e kanë pasur prioritet”, ka deklaruar Bajram Gecaj për gazetën “Bota sot”.