Presidenti i vendit, Hashim Thaçi, përmes një shkrese zyrtare dërguar bartësit të koalicionit fitues të zgjedhjeve të fundit, Kadri Veselit, i ka kërkuar edhe zyrtarisht koalicionit PAN që të propozojnë kandidatin e ri për ta mandatuar për formimin e Qeverisë së Kosovës.
Në anën tjetër, partitë opozitare kanë kërkuar që vendi të shkojë në zgjedhje.
Se a duhet të zgjedhjet një kryeministër nga PAN apo të shkohet në zgjedhje, njohësi i çështjeve politike, Rexhep Shahu, ka thënë për gazetën “Bota sot” se zgjidhja më e drejtë është që vendi të shkojë në zgjedhje dhe të mos i mbetet kohë Thaçit që të përgatisë strategji për pushtet dhe nëse caktohet kryeministër, do të jetë zgjatje e pushtetit për PAN-in.
“Zgjidhja më e drejtë është që vendi të shkojë në zgjedhje sa më shpejt që të mos i lërë kohë Thaçit të përgatisë strategji zhvatje e zhagitje pushteti. Nëse caktohet kryeministër tjetër do të jetë me ia zgjatë jetën PDK-së së korruptuar deri në palcë dhe ta dërgojnë edhe më keq gjendjen, të fitojë kohë PDK të blejë aleatë e të thur aleanca”, është shprehur ai.
Sipas Shahut, nëse vendi shkon në zgjedhje menjëherë, zvogëlohet mundësia e pazareve nga PDK dhe partitë e komandantëve të pasluftës dhe çdo tentativë për t’ia zgjatur jetën pushtetit aktual është shumë e dëmshme.
“Nëse vendi shkon në zgjedhje të reja menjëherë zvogëlohet mundësia e pazareve nga PDK dhe partitë e komandantëve të pasluftës. Çdo tentativë me ia zgjatë jetën pushtetit aktual është shumë e dëmshme për Kosovën. Epoka e të fortëve në politikë duhet të marrë fund. Edhe koha e politikanëve që fitojnë veç humbje në partitë e tjera duhet të marrë fund”, ka deklaruar Shahu për “Bota sot”.