Sekretari i përgjithshëm i Aleancës Kosova e Re, Vesel Makolli në një prononcim për gazetën “Bota sot”, ka demantuar deklaratat e deputetit Milaim Zeka, pasi ky i fundit tha se ka informacione ekskluzive se Behgjet Pacolli do të largohet në këto zgjedhje nga drejtimi i AKR-së.
Sipas Makollit, ky lajm nuk është i vërtetë, pasi ai thotë se një gjë e tillë nuk bëhet ad-hock, ndërsa shpjegon se partia e tij i ka edhe organet e saj nga ku edhe merren vendimet.
“Kjo nuk është e vërtetë. Behgjet Pacolli do të jetë edhe me tej kryetar i AKR-së. Partia e ka kryesinë e saj dhe nuk mundet një gjë e tillë të ndodhë ad-hock. Të bëhet një ndryshim i tillë është e pakuptimtë. Nuk bëhet kjo punë se po shkojë unë dhe po vjen ti. Ka rastisur që z. Selimi të jetë vëllai i Behgjetit, mirëpo të tilla lidhje familjare ka edhe në parti tjera”, ka thënë Makolli.
Ai gjithashtu thekson se kryesia aktuale e AKR-së është vetëm në gjysmë të mandatit.
“Çdo parti ka rregullat e saj, ne i kemi pasur zgjedhjet para dy viteve dhe kjo udhëheqësi ka edhe dy vite mandate, andaj ne jemi në gjysmë të mandatit”, ka thënë sekretari i përgjithshëm i Aleancës Kosova e Re, Vesel Makolli, për gazetën “Bota sot”.
Deputeti Zeka, në një paraqitje televizive ka thënë se ka informacione të sigurta se Behgjet Pacolli do të largohet nga pozita e kryetarit të AKR-së. Ai gjithashtu thotë se ka informacione se në krye të këtij subjekti do të vije Selim Pacolli, raporton “Bota sot”.
Ndërsa, Zeka potencon se qasja e Selim Pacollit do të jetë më ndryshe, krahasuar me politikën e deritanishme të Behgjet Pacollit.
Deputeti Zeka thotë se Behgjet Pacolli ka qenë tolerant në koalicione, dhe se një gjë të tillë nuk do ta bëjë edhe Selimi.