Presidenti amerikan, Donald Trump, ka shkarkuar të martën John Boltonin nga pozita e këshilltarit për siguri, duke thënë se s’është pajtuar me shumë prej sugjerimeve të tij.
“Shërbimet e tij nuk janë më të nevojshme në Shtëpinë e Bardhë. Nuk jam pajtuar me shumë nga sugjerimet e tij, ashtu si edhe të tjerët në administratë”, shkroi presidenti amerikan në Tëitter.
Ndërsa Bolton dha një version tjetër të ngjarjes: “Ofrova dorëheqjen time mbrëmë dhe presidenti Trump tha ‘le të flasim nesër’”.
Kur ishte emëruar në këtë pozitë, Bolton ishte raportuar si kundërshtar i pavarësisë së Kosovës dhe si njëri ndër bashkëpunëtorët më të afërt të Presidentit Trump në Shtëpinë e Bardhë.
Njohësi i çështjeve politike në vend, Fadil Lepaja, ka thënë për gazetën “Bota sot” se arsyet nuk kanë të bëjnë direkt me Kosovën, por raportet e tyre janë ftohur për shkak të mospajtimeve të shumta për çështje të ndryshme.
“Në fakt, arsyet e deklaruara por edhe të padeklaruara nuk kanë të bëjnë me Kosovën drejtpërdrejt. Në fakt, marrëdhëniet e tyre ishin ftohur për shkak të mospajtimeve të shumta rreth çështjeve të ndryshme, e së fundmi sidomos rreth procesit të negociatave me talebanët, në Afganistan”, është shprehur ai.
Sipas Lepajës, serbët e kanë pasur mik dhe përkrahës të kauzës së tyre Boltonin, derisa ishte dhe kundërshtar i pavarësisë së Kosovës.
“Natyrisht, ndërrimet e këtij niveli mund të ndikojnë në drejtimet, por edhe në dinamikën e proceseve, edhe në tema me rëndësi strategjike për SHBA. Në fakt zbutja e konflikteve edhe kundërthënieve me armiqtë e deridjeshëm sidomos me Rusinë, Korenë e Veriut, apo botën islame. Serbët e kanë trumpetuar se John Bolton si kundërshtar i pavarësisë së Kosovës, ishte mik i tyre dhe se ishte përkrahës i kauzës serbe. Njëkohësisht, ka mendime se ai edhe e impononte dialogun me çdo kusht, dhe presionin mbi Kosovën, por sidoqoftë kjo mund të jetë edhe pjesë e spekulimeve”, ka theksuar Lepaja.
Ai thotë se nga largimi i tij mund të pritet zbutje e presionit mbi Kosovën.
“Në përgjithësi, duke ju referuar edhe deklaratave të cilat e pasuan largimin e Bolton, nuk mund të priten efekte negative për Kosovën, madje mund të zbutet presioni mbi Kosovën”, ka deklaruar Fadil Lepaja për gazetën “Bota sot”.
