Ndonëse kushti kryesor për liberalizimin e vizave ka qenë lufta kundër korrupsionit, megjithatë një hap i tillë end nuk ka filluar në Kosovë.
Kështu ka vlerësuar analisti politik Sali Rexhaj i cili në një prononcim për “Bota sot” ka thënë se kjo mortajë po e dëmton shtetin e Kosovës me decenie.
“Kjo mortajë po e dëmton shtetin e Kosovës me decenie, pasi të gjitha raportet ndërkombëtare e vendore, si dhe ne qytetarët e Kosovës po e shohim me sy, se korrupsioni nuk po luftohet fare nga pushteti, e as nga institucionet përgjegjëse”.
“Përkundrazi mendoj se korrupsioni po lulëzon pa pengesa. Kjo për faktin se në zgjedhjet e fundit pati gatishmëri politike që të pastrohen listat e partive politike, o me perjashtim te LDK-es, partite tjera nuk moren guxim qe te perballen me nje gje te tille. Dhe jo vetëm diplomatja zvicerane Katarina Socker, por të gjithë diplomatët e institucionet ndërkombëtare, bëjnë thirrje që të luftohet korrupsioni, sepse ky është kusht mbi kushte për liberalizim të vizave dhe hapja e rrugës për integrime. Andaj besoj se qeveria e re e cila e mori votën për ndryshime do të përballet me korrupsionin. Andaj besoj shumë se vullnetin e qytetarëve për ndryshime pozitive, do ta adresojnë”, ka thënë analisti politik Sali Rexhaj.
Ai konsideron, se luftimi i korrupsioni pa sekuestrimin e pasurisë së fituar me krim e korrupsion, nuk ka asnjë kuptim.
“Pra pos dënimit të krerëve e pjesëmarrësve në korrupsion, pasuria e fituar duhet tu kthehet qytetareve. Puna e suksesi i qeverisë së ardhme do të matet me suksesin e saj, në luftë kundër korrupsionet. Por korrupsioni nuk luftohet vetëm për një kohë, për një mandat, po ajo duhet të jetë luftë permanente”, ka thënë analisti politik Sali Rexhaj.