Vizitat e shpeshta të ambasadorit të SHBA-së në Kosovë, Philip Kosnett në zyrët e dy partive më të mëdha në vend, japin shpresën se ende ka gjasa për një koalicion mes Lëvizjes Vetëvendosje dhe Lidhjes Demokratike të Kosovës. Kështu ka vlerësuar njohësi e zhvillimeve politike në vend.
Përkundër ngërçit të madh, ofertat nga ana e dy partive nuk po mungojnë. Ishte partia e Albin Kurtit, ajo që i bëri ofertën e fundit LDK-së për të arritur marrëveshjen e koalicionit qeverisës.
Aty thuhej që do të rriteshin dy ministri e njëra t’i takonte LDK-së. Por, as kjo ofertë nuk u pranua nga partia e Isa Mustafës.
Analisti dhe njohësi i çështjeve politike në vend, Faton Mehmeti, në një prononcim për gazetën “Bota sot”, është shprehur i bindur se do të kemi një qeverisje mes dy partive fituese të zgjedhjeve të 6 tetorit.
“Vizita e ambasadorit Kosnett në selinë e Lidhjes Demokratike të Kosovës është një shenje se SHBA-ja dëshiron të arrihet sa më parë marrëveshja për bashkëqeverisje. Andaj, duke shikuar nga ky prizëm jam i bindur se do të kemi një qeveri nga VV-LDK, ndryshe këto dy parti rrezikojnë seriozisht marrëdhëniet me SHBA-të”, ka thënë Mehmeti.
Tutje, analisti i çështjeve politike është i mendimit se këtë muaj do të merr fund çështja e koalicionit.
Mehmeti thekson se parti e Kurtit dhe e Mustafës duhet të kenë të qartë se çdo vonesë në krijimin e koalicionit vetëm sa shton dozën e pesimizmit se qeveria e ardhshme do të jetë stabile.
“Nëse ambasadori Philip Kosnett ka paraqitur qëndrimin zyrtar të SHBA, për çka edhe është i thirrur, atëherë jam i bindur se këtë muaj do të merr fund çështja e koalicionit. Në ketë logjikë duhet thënë se pa SHBA-të asnjë marrëveshje nuk është stabile, andaj me bekimin e tyre edhe kjo do të arrihet. Megjithatë, LDK dhe VV duhet të kenë të qartë se çdo vonesë në krijimin e koalicionit vetëm sa shton dozën e pesimizmit se qeveria e ardhshme do të jetë stabile, andaj duhet sa më parë të përfundojnë këtë çështje”, ka thënë Mehmeti.
Kujtojmë se edhe pse kanë kaluar mbi 100 ditë prej zgjedhjeve të 6 tetorit, partia fituese Lëvizja Vetëvendosje nuk ka arritur të formojë qeverinë e re, bashkë me partinë e dytë, Lidhjen Demokratike. Kjo pasi në negociatat mes tyre janë shfaqur dallimet rreth ndarjes së pushtetit.
Ndërkaq, gjatë ditës u raportua se krerët e PAN-it, Ramush Haradinaj, Kadri Veseli, Fatmir Limaj dhe Behgjet Pacolli ishin mbledhur për të mbajtur një takim për arritjen e një marrëveshje për bashkëqeverisje.
Mirëpo nuk shkoi gjatë dhe nga partia e Kadri Veselit u demantua ky lajm. Sipas këtyre të fundit, PDK do të mbetet në opozitë dhe se Veseli është në takime gjatë ditës me zyrtarë të Shqipërisë, përcjell “Bota sot”.