“Trojka” e riaktivizuar – Rrezik për Kosovën

Politika

“Trojka” e riaktivizuar – Rrezik për Kosovën

Idriz Zeqiraj Nga Idriz Zeqiraj Më 14 prill 2020 Në ora: 14:02
Hashim Thaçi, Isa Mustafa dhe Skënder Hysen, foto ilustrim nga "Bota sot"

Ngjarjet e fundit politike në Kosovë, na kthejnë disa vite prapa: "Zajednica", zgjedhja e Hashimit president, "Demarkacioni". Projektues të këtyre nismave, fatale për Kosovën, ishin "Trojka": Hashim Thaçi, Isa Mustafa. Skënder Hyseni. Realizimin e "Zajednicës" e pengoi Lëvizja Vetëvendosje, duke e dërguar çështjen në Gjykatën Kushtetuese. Është, pikërisht, kjo "trojkë", e riaktivizuar sërishmi që projektoi dhe realizoi Mocionin e mosbesimit, për rrëzimin e "qeverisë të shpresës", siç e kanë emërtuar shqiptarët e kudondodhur.

Kush hezitoi koalicionin VV-LDK dhe kush e dështoi atë?

Nisma e koalicionit ishte entuziaste. Por, në krijimin e qeverisë, LDK-ja provoki me presidentin, i cili nuk ishte pjesë për realizimin e bashkëqeverisjes. Kryeklanorët e Isës, me synimin të marrjes të postit të kryetari´të partisët, garonin në servilizëm ndaj Isa Mustafës, duke e joshur për postin e presidentit të vendit! Ky ishte provokimi i parë i madh për Vetëvendosjen. Sepse pranimi i një kuadri të viteve `70-a, për president, demantonte kauzën e ndryshimit në drejtimin e ri të Kosovës, në vitin 2020!

Emërimi Ministër i Brendshëm i një partiaku, kur ai është kundër kësaj qeverie dhe don PDK-në partner, është një provokim tjetër që i bëhej VV-së. Në hapjen e fushatës , për kryetar të Podujevës, Ministri i Brendshëm u thotë qytetarëve se "Vetëvendosje është partia me antorugoviste në Kosovë!" Vërtet, ishte PAN-i ai që granatoi Rugovën në shtëpi dhe e atenatoi në rrugë me tritol. Dhe, siç rrëfen njeriu i dënuar, për këtë rast, nëse nuk do të ishte makina e blinduar, Rugova do të shkonte në ajër, me gjithë makinë. Si shpërblim, PAN-i ka emëruar rektor Universiteti njërin nga autorët e këtij atentati makabër! Dhe, seria e krimeve të PAN-it, kundër LDK-së, është tmerruese!

Shkarkimi i zëvendëskryeministrit të LDK-së, është bërë se ai ka kundërshtuar serinë e shhkarkimeve të kryeministrit Kurti. Por, "çinovnikët", aparatçikët burokratë, janë stopues të proceseve reformative, që duan statusquon. Dhe, nëse nuk largohen nga postet, dështojnë zhvillimin, ecjen para. Por, Hoti zbaton urdhërat e shefit Isë: "Ne nuk jemi aty (në qeveri) të shkarkojmë borde e të emërojmë njerëz të VV-së". Nëse nga 27 emërime, katër ishin partiakë të VV-së, PAN-i ka emëruar të 27 partiakë, plus 10 partiakë shtesë, "sa për t`u gjendur Kola në punë",- siç thotë populli për "tundësit e zinxhirëve!" Dhe, Isa ka heshtur për "xhevahiret PAN-iste! 

Megjithatë, fajësi e Albinit është se nuk konsultoi kreun e LDK-së, për mëkatet e tyre.

Fundja, edhe sikur kryeministri Kurti t`i shkarkonte të gjithë ministrat e LDK-së, duhej të toleronte, për hirë të Kosovës, për të parë reformat, ndryshimin, të cilin LDK-ja, nuk arriti ta bëjë asnjëherë, edhe pse ishte pjesë e pushtetit vite me radhë. Sepse, gjithëherë, disa nga zyrtarët e saj, ishin argatë të partnerit në koalicion. Për të satën herë LDK-ja u poshtrua nga PAN-i. Dhe, përsëri vazhdon të mbetët bisht i tij. Sepse uzurpuesit e partisë, janë të shantazhuar nga SHIK-u. Ata e dinë këtë dhe vazhdojnë të zvarritën, pa pasur guximin qytetar, ta lirojnë LDK-në nga ngulfatja e mëtejme.

Madje, LDK-ja premtoi, ndër vite, nga njëri Kuvend Zgjedhor në tjetrin, për reformën në parti. Por, kurrë nuk e bëri! Përkundrazi, pas amëshimit të kryezotit Rugovë, e degradoi procesin zgjedhor, deri në degjenerim të plotë, duke braktisur votimin e fshehtë demokratik, për ta zëvendësuar me atë të hapur, aklamativ! Pra, e ktheu metodën moniste të drejtimit në parti, për ta siguruar sundimin e klanit në qendër dhe bazë. Kamuflimi i mendimit ndryshe në LDK-e, ka shërbyer për goditjen e heshtur të kuadrove rugovistë. Lexoni sulmet ndaj deputetit të vetëm të Kabinetit të Rugovës, Fatmir Rexhepi, pas deklaratës dinjitoze të tij. Dhe, bindeni.

Veprimet e LDK-së, Mocioni i mosbesimit, deri në realizimin e shkarkimit të qeverisë të koalicionit VV-LDK, është vepër e "trojkës" Thaçi, Mustafa , Hyseni. Dhe, kjo është e keqja e katërtë e radhës.

Qëllimi i të keqës së pestë, është realizimi i koalicionit me PAN-in. Logjistikë e drejtëpërdrejtë e "trojkës", janë ndoca gazetarë të PAN-it, armiq të hershëm të LDK-së dhe të Presidentit Rugova, si Baton Haxhiu dhe Milaim Zeka, fort të zëshëm në medien televizive. Ilustrojmë intrigat nxitëse për LDK-në, me synim ndarjen e saj. Batoni: "Kali i Trojës" në LDK-e është Vjosa Osmani", ndërkohë që opionistët mendonin ndryshe, pra, për palën kundërshtare të Vjosës.

Milaimi: "Fajtore është Vjosa Osmani se ka trimnue Albinin në veprimet e tij!" Ndërkohë që dihet se Albini trimërinë e ka të bollshme dhe nuk i duhet nxitja e të tjerëve. Ai ofron shërbimin e ndërmjetësuesit për një aleancë në mes Kurtit dhe Veselit të PDK-së.

"Trojka" e riaktivizuar, parathotë rrezikun e madh për Kosovën. Marrëveshja me Serbinë, ndarja e Kosovës, është e keqja kulmore, që mund t`i ndodhë Kosovës. Përfolja për mundësinë e çmontimit të akuzave faktike, të ngritura nga Gjykata Speciale, forcon gadishmërinë e Hashimit për "kompromiset e dhimbshme", që ka paralajmëruar me kohë.

Skënder Hyseni nuk mori besimin e popullit për deputet, më parë. Duke qenë anëtar i Kryesisë të LDK-së, tha se "është defekt i madh rrëzimi  qeverisë së PAN-it", duke rënë në kundërshtim me strukturat e  e partisë. Por, në vend të kafshimit, për shërbime ndaj PAN-it, atë e puthën, duke emëruar sekretar për Marrëdhënie të Jashtme nga LDK-ja! Skënderi ishte idhnak edhe në mbrojtjen e fotografisë të Hashim presidentit.

Trumbëtimi mashtrues se çdo marrëveshje vjen në Parlament dhe ajo që nuk pëlqehet, refuzohet nga deputetët! Ky është mashtrim që i bëhet popullit. Deri tani, çdo marrëveshje e ardhur në Parlament, ka kaluar pa pengesa, pavarësisht ligjëshmërisë apo jo. Pse? Sepse 20 deputetë me ulëse të rezervuara, votojnë çdo gjë që është e dëmshme për Kosovën. Subjektet e interesuara, për vendime fatale, për Kosovën, LDK-PDK, siç ka qenë Demarkacioni, zgjedhja e Hashimit president, janë kaluar lehtësisht. 

Rrëzimi i Qeverisë Kurti, më 25 mars 2020, e vendosur për çkapjen e shtetit nga krimi i organizuar dhe hajnia zyrtare, na kujton heqjen e Autonomisë të Kosovës, në mars 1989. Është "diktatura e numrave", që mundi pakicën prej vetëm 10 (dhjetë) delegatëve kundërshtues, të prirë nga Ukë Bytyçi, sot, Hero i Kosovës.

Për ta refuzuar kryetarin Mustafa, në thirrjen e tij, për "marrjen në parim të pajtushmërisë nga Këshilli i Përgjithshëm, për një koalicion qeverisës me AAK, NISMA dhe komunitetet", pra, kthimin e krimit në pushtet, frymëzohuni nga deputeti Fatmir Rexhepi, i vetmi deputet nga Kabineti i Presidentit Rugova: "Rënia e ekzekutivit është kundër mesazhit të qytetarëve, për një Qeveri që garantonte ndryshim e drejtësi...Kam refuzuar të bëj argatin në punëtorinë "Hajde ta prishim shtëpinë e re"...Vazhdoj t`i mbetem besnik traditës dhe frymës së ndërtimit të institucioneve demokratike",- thotë deputeti i dinjitetshëm, Fatmir Rexhepi, në kundërshtinë e tij, ndaj planeve errëtake të klanit Mustafa, për ta kthyer PAN-in në pushtet.

Pandemia ka mbyllur njerëzimin në burg global shtëpijak. LDK-ja nuk ishte "me bythë në prush", për t`u handakosur, aq pamoralshëm dhe tërësisht pacipshëm, kundër popullit të Kosovës, me një nismë zuzare, në një kohë zezonë. Natyrshëm lind dyshimi: Mos, vallë, klani Mustafa ka një arsye më shumë se shkarkimet e Kurtit në qeveri. Aleanca e LDK-së me PAN-in, ngjason shumë me koalicionin e partive-banda në PAN, për t`u mbrojtur nga Gjykata Speciale. Dihet, LDK-ja nuk ka struktura vrastare, siç akuzohet bazueshëm PAN. Por, për abuzimet korruptive individuale e grupore, nuk përjashtohet.      

Përndryshe, "SHIK-u, (siç pranon njëri nga eksponentët e tij kryesor), është pjesë në të gjitha partitë". SHIK-u nuk ka luftuar, nuk ka punuar asgjë të mirë për Kosovën. Por, ka hetuar e shënuar aferat e liga të zyrtarëve, për ta shantazhuar, rrjedhimisht, dëmtuar LDK-në. 

Më parë, kam shprehur mendimin që Vetëvendosje të plotësojë vetëm kushtin e heqjes të taksës 100 %. Tani, mendoj se LDK-ja duhet t`i kërkojë falje Vetëvendosjes, për Mocionin e mosbesimit, i cili u projektua nga PAN-i dhe u nismua nga LDK-ja. Është në të mirën e LDK-së, të reflektojë, të shpëtojë atë çka mund të shpëtohet, për të dalë nga kriza e thellë morale e faktike, ku e gremisi PAN-i, me hafijet e tij brenda LDK-së. Vazhdimi i koalicionit me VV-në, nuk ka alternativë të dytë. Inati në politikë është humbës. Edhe tallja, provokimi i përsëritur ndaj anëtarësisë dhe elektoratit të LDK-së, duhet të këtë kufi!

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat