Qeveri në pandemi! Forcat politike nuk përmbahen as në kohë krizash

Politika

Qeveri në pandemi! Forcat politike nuk përmbahen as në kohë krizash

Nga: D.B. Më: 21 prill 2020 Në ora: 14:35
Objekti i Qeverisë

Formimi eventual i Qeverise së re sjell rrezikun e pengimit të zbatimit të masave dhe të aktiviteteve për luftë kundër virusit korona. Kjo për faktin se ngjarjet e fundit politike në Republikën e Kosovës i nxorën në shesh shumë të meta dhe anomali sa i përket funksionimit të sistemit politik në aspektin praktik në Republikën e Kosovës.

Kështu ka vlerësuar analisti politik Ejup Berisha i cili në një prononcim për gazetën “Bota sot” ka thënë se një sistem i tillë politik dëshmon se në të ka mungesë të kapaciteteve demokratike të subjekteve politike të Republikës së Kosovës.

“Në raste krizash politike mese i nevojshëm është uniteti i forcave politike të cilat formalisht apo gojarisht çdo herë trumbetojnë se janë për unitet apo për bashkërenditje të veprimeve politike me qëllim të daljes së vendit nga kriza, mirëpo uniteti dhe bashkërenditja e aktiviteteve dhe veprimeve është mese i domosdoshëm të bëhet në realitet e jo vetëm së gojarisht. Në Republikën e Kosovës fatkeqësisht nuk kemi vetëm se krizë politike, por kemi krizë humanitare e cila edhe më shumë e shton nevojën e unitetit dhe të bashkërenditjes së aktiviteteve dhe veprimeve të forcave politike si të atyre në pushtet por edhe të atyre në opozitë”, ka thënë analisti politik Ejup Berisha.

Image
Ejup Berisha

Sipas tij, në kushte të një pandemie globale dhe shumë të rrezikshme në vend që forcat politike në Republikën e Kosovës të bashkohen dhe të propozojnë masa dhe të hulumtojnë mënyra për luftimin e Pandemisë së rrezikshme, këto forca u përçanë rreth një çështje shumë të ulët dhe banale që njihet si përçarje i cili është një luks që nuk guxuan t’ia lejojnë vetes në këto rrethana forcat politike vendore.

“Çfarë mendoni ju se opozita në Gjermani nuk do që të vie në pushtet apo dhe opozita në SHBA si dhe forcat opozitare tjera gjetiu nëpër shtetet e botës nuk e duan pushtetin dhe nuk munden të organizojnë ndonjë sulm ndaj partive në pushtet dhe të tentojnë të vijnë vetë në pushtet. Po pra kjo është shumë e lehtë në kushte të një krize të tillë shumë të rrezikshme çdo forcë politike opozitare mund të rebelohet dhe të thotë se nuk është e kënaqur me masat që i ndërmerr Qeveria e shtetit të vet dhe të tentoj ta marrë pushtetin në duart e veta. Por jo të gjitha forcat politike të shteteve të botës çofshin këto me sistem demokratik apo me sistem autokratik apo dhe me sistem diktatorial të qeverisjes kanë vendosur që ti varrosin sëpatat apo ti lënë anash kundërshtitë dhe konfliktet e tyre politike dhe janë përqendruar në bashkërendimin e veprimeve dhe aktiviteteve për zbatimin e masave dhe veprimeve efikase në luftën kundër armikut të përgjithshëm virusit korona. Si duket vetëm se në Republikën e Kosovës forcat politike nuk mundën të përmbahen në luftën për pushtet”, ka thënë Berisha.

Ai konsideron se me këtë forcat politike Kosovare dëshmuan se nuk kanë vetëdije politike dhe kombëtare dhe se mendojnë vetëm se për interesat e tyre individuale dhe të atyre të ngushta grupore për të ardhur në pushtet dhe se këto forca nuk posedojnë vetëdije për ruajtjen e interesave të përgjithshme kombëtare.

“Pra duhet thënë se forcat politike në Republikën e Kosovës me rastin e inicimit të Mocionit të mosbesimit që në fakt është instrument legal demokratik por jo në kushte krize e bënë precedencën e paparë askund në botë dhe e rrëzuan Qeverinë në vend që të angazhohen në luftën kundër armikut numër një të qytetarëve të Kosovës virusit korona. Rasti në fjalë nuk dëshmon vetëm se për mungesë të vetëdijes politike dhe kombëtare por edhe për mungesë të etikës politike si dhe për mungesë të kulturës politike të Partive politike të Kosovës. Në kushte krizash apo dhe katastrofash të mëdha edhe kafshët si dhe insektet dinë të bashkohen dhe tentojnë të gjejnë zgjidhje për dalje nga kriza ndërsa si duket vetëm se partitë politike të Kosovës në kushte të tilla dinë të mobilizohen e të luftojnë për pushtet por jo edhe që të bëjnë përpjekje për bashkërendim forcash për dalje nga kriza e madhe humanitare në të cilën ndodhet jo vetëm se Republika e Kosovës por në të cilën ndodhen edhe të gjitha shtetet e botës”, ka thënë analisti Berisha.

Ai tutje ka shtua se sjellja e matur e të gjitha forcave politike të shteteve të botës në këtë periudhë duhet të jetë mësim edhe për forcat politike të Kosovës se si duhet të sillen me pjekuri dhe me vetëdije komfor situatave të tilla jo vetëm të pavolitshme por edhe shumë të rrezikshme.

“Dhe nëse tani forcat politike opozitare tentojnë të formojnë Qeveri të re kjo do ta rrezikonte zbatimin e masave të Qeverisë në luftën kundër virusit korona gjë që është veprim shumë i pakuptimtë sepse zbatimi i atyre masave është shpresë për shmangien e infektimit të njerëzve apo do të mund të kontribuonte në shpëtimin e jetëve të njerëzve.Të gjitha forcat politike në pozitë dhe opozitë duhet të jenë të vetëdijshme për situatën e rëndë dhe të pavolitshme nëpër të cilën po kalon Republika e Kosovës në momentin aktual e cila kërkon më pak politizim të situatës e më shumë përpjekje për të ndihmuar qytetarët e Kosovës të cilët kanë nevojë për ndihmën e forcave politike të vendit”, ka thënë analisti politik Ejup Berisha.

commentFirst article
Sot mund të lexoni Shfletoni kopertinat