Pasi rrëzoi Qeverinë Kurti, pjesë e të cilës ishte, LDK pritet të formojë qeverinë e re me AAK-në, Nismën dhe Listën Serbe.
E për kryeministër, LDK ka kandiduar Avdullah Hotin.
Por, LDK ishte në përgatitje të mocionit për rrëzimin e Qeverisë edhe kur Ramush Haradinaj ishte kryeministër, gjë që nuk ndodhi, pasi ky i fundit dha dorëheqje.
E tani këto parti bashkë do të qeverisin me vendin.
Lidhur me këtë, avokati Tomë Gashi, ka thënë për gazetën "Bota sot" se vullneti i qytetarëve ishte qeveria me VV-në dhe kjo që po tentohet të formohet është antikushtetuese.
"LDK mund të tentojë të formojë qeveri antikushtetuese duke e tradhtuar votën e mbi 200.000 votuesve, të cilët votuan për ndryshime dhe votuan që të qeveriset së paku 4 vite me LVV. Ky ishte vullneti i qytetarëve që të formohet qeveria me VV, e quajtur Qeveria e shpresës", është shprehur ai.
Sipas Gashit, LDK e tradhtoi elektoratin dhe i veniti qëllimisht pritjet për një shtet të së drejtës.
"LDK e tradhtoi elektoratin e vet dhe bashkë me këtë tradhti, e tradhtoi popullin e Kosovës duke e thyer deri në palcë shpresën për ndryshime në Kosovën e pasluftës. LDK i veniti qëllimisht të gjitha pritjet për një shtet të ligjit dhe të së drejtës. LDK nuk lejoi që të luftohet krimi i organizuar i cili e ngulfati Kosovën për 20 vite", ka vlerësuar avokati.
Më tutje, ai thotë se LDK zgjodhi për partner një partner që e shau dhe Mustafa ia kujtoi Haradinajt Liqenin e Radoniqit, edhe pse ai është shpallur i pafajshëm dhe tani i harruan të gjitha e u bënë bashkë.
"LDK zgjodhi partner për një aventurë të radhës ata që i shau duke i quajtur me lloj lloj emërtime poshtëruese deri në atë masë sa ja kujtoi vet Isa Musatafa Liqenin e Radoniqit Ramush Haradinajt , ku aludimi ishte tepër i rëndë edhe pse Ramushi ishte liruar nga akuzat për vrasje të cilëve të gjetur në Liqenin e Radoniqit gjatë luftës. Këto aludime jo njerëzore i harroi edhe Isa Mustafa edhe vet Ramush Haradinaj për interesa të marrjes me dhunë të pushtetit sipas tyre me fuqinë e numrit të votave që i kanë në Parlament të Kosovës", ka thënë Tomë Gashi për "Bota sot".
Se çfarë mund të presim nga kjo qeveri, avokati ka thënë se do të kthehemi në kohën e VLAN-it.
"Se çfarë qeverie mund të presim edhe nëse ajo bëhet në kundërshtim të ligjit dhe Kushtetutës është e qartë. Do të ktheheni në kohën e VLAN -it dhe në kohën e dëshpërimit dhe depresionit të thellë deri sa të kemi qeveri të tilla që prioritet e kanë veten, partinë, interesat personale dhe interesat e 82 deputetëve të lloj lloj ngjyrave politike", ka theksuar ai.
Sipas tij, një pjesë e LDK-së kanë tradhtuar idealet e Ibrahim Rugovës, derisa shton se Avdullah Hoti do të duhej të mos e pranonte postin e kryeministrit, pa e refuzuar atë Vjosa Osmani.
"Një pjesë e LDK e tillë çfarë kemi tani janë larg LDK-së së presidentit historik Ibrahim Rugova dhe janë duke e tradhtuar popullin dhe idealet e Ibrahim Rugovës. Avdullah Hoti nuk duhet ta pranojë postin e Kryeministrit pa e refuzuar këtë Vjosa Osmani në emër të cilës LDK votoi rreth 200.000 vota në emër të saj", ka deklaruar Tomë Gashi për "Bota sot".
