Deputetja e Lidhjes Demokratike të Kosovës, Vlora Limani-Hajnuni, për gazetën “Bota sot”, ka thënë se rimëkëmbja ekonomike, rindërtimi imazhit të Kosovës në arenën ndërkombëtare, sundimi i ligjit, do të jenë një nga prioritetet kryesore të qeverisë së re.
Sipas deputetes së LDK-së, sfidat që do t’i ketë përballë qeveria Hoti, nuk do jetë fare të lehta.
“Rimëkëmbja ekonomike, rindërtimi imazhit të Kosovës në arenën ndërkombëtare, sundimi i ligjit, problemet në shëndetësi e arsim, problemet në fushën e politikave sociale, mendoj që do jenë çështjet e para me të cilat kjo qeveri duhet të përballet, pavarësisht që nuk do jetë fare e lehtë”, ka thënë deputetja e LDK-së.
Kurse, e pyetur se nëse do të mbaheshin zgjedhjet e reja në këtë kohë, a do ta kishte rezultate të mira partia e Isa Mustafës, deputetja e LDK-së është shprehur se partia e saj është ringritur edhe më fuqishëm.
“Lidhja Demokratike e Kosovës ka traditë 30 vjeçare dhe sa herë që oponentët politikë të LDK-së e kanë menduar dhe janë ndjerë optimistë për fundin e LDK-së, LDK është ringritur edhe më fuqishëm”.
Kujtojmë se i mandatuari i Lidhjes Demokratike të Kosovës për kryeministër, Avdullah Hoti, ka thënë se veprimet e fundit të qeverisë në detyrë të Kosovës “nuk e ndihmojnë vendin, por e vënë atë në kurth”.
Reagimi i tij vjen pasi qeveria në detyrë e udhëhequr nga Albin Kurti të shtunën në mbrëmje zgjeroi masat e reciprocitetit ndaj Serbisë.
"Qeveria e re do të koordinohet me partnerët strategjikë të Kosovës duke hequr çdo pengesë për dialog. Vetëm përmes këtij koordinimi ne e avancojmë pozitën e Kosovës në arenën ndërkombëtare dhe ia heqim Serbisë alibinë për ta zvarritur marrëveshjen për njohjen reciproke", ka shkruar Hoti në rrjetin social Facebook.