Kryeministri i Kosovës, Avdullah Hoti, ka thënë se ai do ta udhëheq dialogun dhe se së shpejti do të udhëtojë drejtë Washingtonit për të diskutuar për dialog.
E presidenti që ishte kryesues i dialogut me Serbinë, anuloi vizitën në SHBA për shkak të aktakuzës së ngritur nga Specialja.
Lidhur me këtë, profesori Riza Smaka, ka thënë se me Kushtetutë presidenti e udhëheq politikën e jashtme, andaj presidenti duhet ta përfaqësojë Kosovën brenda e jashtë saj.
"Sipas Kushtetutës, Presidenti e udhëheq politikën e jashtme, është shef i shtetit, e përfaqëson Kosovën në vend e jashtë ndërsa Kryeministri e konsulton Presidentin referuar ekzekutimit të politikës në vend. Pra Presidenti e jo Kryeministri e përfaqëson Kosovën në vend e jashtë, pavarësisht do farë opinioneve të Gjykatës Kushtetuese e cila mund të interpretojë por jo edhe të krijojë norma kushtetuese as ligjore", është shprehur ai.
Sipas Smakës, për shkak të aktakuzës ndaj presidentit është krijuar hendikep, ndërsa kryeministri nuk e ka autorizimin e tij dhe është i zgjedhur me dy vota invalidore, duke shtuar se Kuvendi do të mund të formonte një delegacion për prezantimin e Kosovës jashtë.
"Pasi që kundër Presidentit është e ngritur aktakuza penale në atë mënyrë është krijuar një hendikep serioz për ushtrimin e funksioneve të tija konform me Kushtetutën e Kryeministri nuk i ka autorizimet e Presidentit në një anë dhe është i hollë me legjitimitet pasi që është zgjedhur në mënyrë problematike madje edhe me dy vota invalidore, një të shkaktuar me joshje e kanosje eventuale e tjetra e dhënë nga personi i dënuar mbi një vit për shkak nuk ka pasur mandat të deputetit. Gjithsesi Kosova nuk mund të mbetet e papërfaqësuar dhe do të duhej që Kuvendi të formonte një delegacion enkas për prezantimin dhe reprezentimin e vendit tonë brenda dhe jashtë", ka deklaruar profesori Riza Smaka për "Bota sot".
