Lëvizja Vetëvendosje ka filluar sot mbledhjen e nënshkrimeve për ta rrëzuar Qeverinë Hoti përmes mocionit të mosbesimit.
Shefi i Grupit Parlamentar të Vetëvendosjes, Rexhep Selimi ka bërë të ditur se pretendojnë t’i marrin votat e mjaftueshme për ta rrëzuar Qeverinë Hoti, pa dhënë sqarime nëse e kanë mbështetjen e PDK-së, apo jo. Por Selimi ka shtuar se pret reflektimin e PDK-së për rrëzimin e qeverisë.
“Partia Demokratike e Kosovës është subjekt opozitar në Parlamentin e Kosovës, në retorikën e tyre kemi parë që ata kanë qasje kundrejt qeverisë aktuale. Ne presim që ata t’i mbajnë fjalët e tyre dhe t’i realizojnë me veprime konkrete. Sa i përket GP të Listës Serbe, jo, nuk iu kemi drejtuar me shkresë as me kërkesë. Ata janë partnerë në koalicionin aktual dhe nuk kemi parë ndonjë divergjencë nga partneri i tyre kryesor nga LDK-ja dhe ata janë sot partnerë qeverisës dhe nuk kemi vlerësuar që ne duhet t’u kërkojmë diçka prej tyre në përputhje me qëndrimet tyre aktuale… Ne pretendojmë t’i kemi votat e mjaftueshme dhe të domosdoshme për rrëzimin e qeverisë… Presim qëndrimin e tyre (AAK-së)”, tha Selimi.
Por a do të ketë sukses Vetëvendosje? A do të arrij t’i hakmerret LDK-së dhe ta rrëzojë Qeverinë Hoti?
Për këto, për “Bota Sot” ka folur analisti dhe njohësi i zhvillimeve politike në vend, Nexhat Haziri.
Ai nuk beson se do të ketë sukses mocioni i paralajmëruar i Vetëvendosjes.
“Se partitë politike me dallim nuancash të vogla, në Kosovë nuk zgjedhin mjete apo forma për t’i arritur qëllimit të tyre, që si duket është më primar, marrja e pushtetit me çdo kusht. Nisma e Vetëvendosje për mbledhjen e nënshkrimeve për procedimin e mocionit të mos besimit ndaj Qeverisë Hoti, është më shumë një nga manifestimet e tyre deklarative të kundërshtimin të qeverisë dhe kryeministrit Hoti, se sa diçka që LVV-ja do të mund ta materializoj nismën e saj për ta rrëzuar qeverinë Hoti”, thotë Haziri.
Ai ka treguar edhe arsyet pse Vetëvendosje nuk mund ta rrëzojë Avdullah Hotin nga posti i kryeministrit.
“Së pari LVV-ja nuk i ka numrat e duhur për ta materializuar suksesshëm në favorin e saj nismën për mocion ndaj qeverisë Hoti. E dyta PDK-ja edhe pse në formë deklarative ka dhënë mbështetje këtij mocioni në fund nuk do t’i jap nënshkrimet apo edhe në seancën e mocionit do të votoj kundër mocionit duke e vënë në lajthitje LVV-në, për arsye të problemeve që ka tashmë PDK-ja në mungesë të një lidershipi me kredibilitet pasi Presidenti Thaçi si lider shpirtëror i tyre dhe lideri partiak Kadri Veseli kanë aktakuza të propozuara nga prokuroria e Gjykatës Special, dhe nuk është momentum më I mirë I këtij subjekti politik, dhe e treta qeveria Hoti ka mbështetjen e partnerëve ndërkombëtar, gjë që nuk e patë apo e humbi qeveria e ish-kryeministrit Kurti”, shprehet Haziri për “Bota Sot”.
Për fund, analisti Haziri deklaron se vetëm një gjë do t’i bënte bashkë LVV dhe PDK.
“E që ky mund të jetë kusht I vetëm I PDK-së për t’iu bashkuar dhe mbështetur nismës për mocion ndaj qeverisë së kryeministrit Hoti, është përkrahja e LVV-së për nismën e PDK-së për shfuqizimin e Gjykatës Speciale dhe miratimit të ligjit për mbrojtjen e vlerave të luftës së UCK-së, kërkesa këto që PDK-ja do t’ia parashtronte si kushte LVV-së para se të shkohej në seancë për mocionin ndaj qeverisë Hoti”, përfundon analisti politik, Nexhat Haziri.