Me 15 janar (të shtunën), deputetët e Kuvendit të Kosovës në një seancë të jashtëzakonshme miratuan rezolutën kundër mbajtjes së referendumit antikushtetues të Serbisë për ndryshime kushtetuese atje.
Kjo rezolutë u votua me 76 vota për, asnjë kundër dhe një abstenim.
Pjesëmarrëse në këtë seancë ishin Lëvizja Vetëvendosje (LVV), Lidhja Demokratike e Kosovës (LDK) dhe Aleanca për Ardhmërinë e Kosovës (AAK). Ndërsa, Lista Serbe mori pjesë vetëm në fillim të seancës, e që më pas e lëshoi sallën para votimit të rezolutës.
E partia e cila e shpërfilli tërësisht këtë seancë me rëndësi të madhe për sovranitetin e Kosovës ishte Partia Demokratike e Kosovës (PDK).
PDK e vlerësoi si të panevojshme mbajtjen e seancës së jashtëzakonshme të Kuvendit të Kosovës për referendumin e Serbisë brenda territorit të Kosovës.
“PDK-ja e sheh krejt të panevojshme thirrjen e kësaj seance dhe nuk do të jemi pjesë e saj ditën e nesërme. Ne i kemi dhënë mbështetje një parimi, të cilin e ka shtyrë përpara Qeveria dhe nuk ka nevojë të prodhojë debat të mëtutjeshëm, prandaj e konsiderojmë të panevojshme mbajtjen e një seance të tillë, që është përpjekje e Qeverisë për shmangie të përgjegjësisë. I bëjmë me dije kryeministrit se zbatimi i ligjeve dhe vendimeve që rrjedhin nga ligjet është ekskluzivisht përgjegjësi e Qeverisë dhe jo e Kuvendit. Rendi kushtetutës nuk mund të mbrohet me rezoluta”, thotëTahiri.
Ky vendim i PDK-së u kritikua ashpër, madje u paralajmërua se kjo gjë do t’i kushtojë shumë në vota elektorale, kësaj partie.
Sipas rezolutës, mbajtja e referendumit të Serbisë në Republikën e Kosovës, "cenon sovranitetin dhe rendin kushtetues të Republikës së Kosovës, është në kundërshtim me Kushtetutën, ligjet e Republikës së Kosovës, si dhe me normat e praktikat ndërkombëtare".
Qarri: Vendimi i papritur e arbitrar i partisë së Thaçit e Veselit
Njohësi i çështjeve politike, Gani Qarri e vlerësoi si vendim arbitrar mospjesëmarrjen e PDK-së në seancën e jashtëzakonshme për referendumin serb.
Ai në një prononcim për gazetën “Bota sot” u shpreh se ky veprim i PDK-së ishte në një linjë me Listën Serbe dhe se ky ishte një akt i rëndë i tradhtisë ndaj shtetit.
“Vendimi i papritur e arbitrar i partisë së Hashim Thaçit e Kadri Veselit, për veprimin e paprecedent të PDK-së në kooketim si në kohën e vëllazërim-bashkimit me “Listën serbe”, për mos-votimin e rezolutës së Kuvendit të Kosovës, kundër mbajtjes së referendumit të Serbisë okupatore në territoret Republikës së pavarur e sovrane të Kosovës, për të gjithë ne, është akti më i rëndë i tradhtisë shtetërore dhe kombëtare, i pa ndodhur ndonjëherë më parë, në gjithë historinë më të re të pasçlirimit të Kosovës.
Ndaj gëzon shumë fakti se, me gjithë mospjesëmarrjen e PDK-së, dhe të simotrës së saj, "Listës serbe", në seancën e jashtëzakonshme parlamentare, votimi i rezolutës së 15 janarit të vitit 2022 në Kuvendin e Kosovës, vërtetoi edhe njëherë më tepër, para opinionit vendor dhe atij ndërkombëtar, se me udhëheqjen e re shtetërore, Kosova ka Zot dhe shteti ynë i pavarur e sovran, më nuk mund të përdoret si “Principatë” e Aleksandër Vuçiqit, siç e pati shndërruar Kosovën dikur, Hashim Thaçi &Co”, deklaroi analisti.
Krahas kësaj, Qarri thotë se mospjesëmarrja e PDK-së i la pa fjalë të gjithë opinionin publik, ku kundërshtoi të gjitha partitë politike dhe veproi në koketim me Listën serbe.
““Principatë” ku Vuçiqi kokë më vete organizonte zgjedhje dhe mbante referendume njëjtë si në Serbi, duke vendosur si në qeverisjen e kuislingut Hashim Thaçi &Co edhe për rregullimin e brendshëm shtetërorë të Kosovës, sa herë donte dhe kudo që dëshironte, pa pyetur askënd.
Por, ajo që së fundi la pamend gjithë opinionin e Republikës së Kosovës, ishte veprimi i paprecedent i PDK-së, e cila e vetme, u nda nga të gjitha partitë shqiptare dhe veproi në koketim me "Listën serbe", për bojkotimin e seancës së miratimit të rezolutës së kërkuar nga Qeveria e vendit, për ndalimin e referendumit të Serbisë okupatore në Kosovë”, theksoi ai.
Motivi i vetëm që PDK-ja refuzoi pjesëmarrjen në seancëne jashtëzakonshme të referendumit serb
Në vazhdim, analisti përmendi motivin që e shtyu PDK-në që të mos marrë pjesë në seancën e jashtëzakonshme të thirrur nga kryeministri Kurti.
Sipas tij, PDK-ja edhe pas arrestimit të Thaçit po vazhdon bashkëpunimin me Listën serbe dhe Aleksandër Vuçiqin.
“Prandaj motivi i vetëm që PDK-ja refuzoi pjesëmarrjen në një seancë kaq të rëndësishme për qytetarët dhe shtetin e pavarur të Kosovës, mund të jetë vetëm vazhdimi i koketimit të PDK-së edhe pas burgosjes së kuislingut Thaçi, në tandem vëllazërim-bashkimi, me “Listën serbe” dhe Aleksandër Vuçiqin, kundër tërësisë territoriale të vendit dhe për mos shtrirjen e shtetësisë së Kosovës edhe në veriun e dominuar tash e dy dekada nga bandat kriminale në krye me ZvonkoVeselinoviqin dhe MilanRadoiçiqin, me të cilët PDK dhe partitë e inkriminuara, po dëshmohet publikisht se kishin lidhje të shumëfishta.
Një sjellje kaq e paprecedent brengos jo vetëm qytetarin dhe punëtorin e thjeshtë, por edhe politikën dhe mbarë opinionin publik të Republikës së Kosovës, ngase me aktin e fundit, u vërtetua katërçipërisht se kryesia aktuale e PDK-së, edhe pas arrestimit të babait të saj ideor, jo vetëm që mbetet ambasadore e patundur dhe besnike e Aleksandër Vuçiqit, por se, me apo ndoshta edhe pa vetëdije, krijon bindjen tek mbarë opinioni i Kosovës, se PDK-ja edhe si segment politik, nga kryesia aktuale, mund të jetë kthyer në filiale të "Partisë Përparimtare Serbe" në Kosovë”, thotë Qarri.
Tutje, ai kërkoi nga Qeveria dhe organet e rendit që të fillojnë hetimin e disa anëtarëve të veçantë të kryesisë së PDK-së, nëse jo të gjithë kryesinë e kësaj partie, që të vërtetohet, se a janë ata me Kosovën, apo me Aleksandër Vuçiqin!
Krejt në fund, Qarri thotë se kundërshtimi i seancës nga ana e PDK-së rriti frikën te qytetarët e vendit, duke shtuar dyshimet se kryesia e kësaj partie vazhdon të mbetet peng i Vuçiqit dhe strukturave të SHIK-ut.
“E sqarimi i këtij argumenti qenësor është në interesin më parësor të shtetit të ri të Kosovës, sepse përveç faktit të ditur, që ky veprim i PDK-së, rrit pa masë frikën tek të gjithë shqiptarët në vend, se kryesia e kësaj partie, vazhdon të mbetet peng i Vuçiqit dhe si një strukturë e SHIK-ut, ilegal, vepron e maskuar në politikë, për interesa të Serbisë në Kosovë, nëse ky dyshim, dëshmohet edhe nga hetimet, Kuvendi i Kosovës, deputetët dhe politikbërësit e prekur nga kjo sindromëvuçiqiane, duhet ti përjashtojë urgjentisht nga pozita e deputetit dhe gjithë politika e Kosovës, në mënyrë që argatët e Serbisë, të shantazhuarit dhe hyzmeqarët e saj, të mos kenë më pozita udhëheqëse në partitë shqiptare as organet shtetërore të Kosovës”, përfundoi Gani Qarri për “Bota sot”.
Mehmeti: PDK-ja do të ndëshkohet për këto veprime
Ndërsa, analisti politik, FatonMehmeti u shpreh se PDK nuk mori pjesë në seancën për referendum vetëm që të parandalojë sukseset e qeverisë Kurti.
Ai në prononcimin për gazetën “Bota sot” tha se ndonëse ky referendum ishte një sukses për Kosovën, PDK nuk e dëshiron vetëm për faktin se qeveria udhëhiqet nga Albin Kurti.
“PDK-ja me mos pjesëmarrjen në Kuvend ka tentuar që mos të miratohet rezoluta, në mënyrë që ta parandalonte një sukses të qeverisë Kurti. Faktikisht, ky është sukses i Kosovës, por PDK-ja e ka si qëllim ta parandalojë çdo sukses të Kurtit, pavarësisht se a është apo jo në interes të vendit”, deklaroi Mehmeti.
Më tej, analisti paralajmëroi ndëshkime të mëdha për Partinë Demokratike të Kosovës, duke shtuar se qytetarët nuk do e harrojnë faktin se si nuk e mbështeti një vendim kaq të rëndësishëm për Kosovën.
“Me këto veprime, PDK-ja po bën autogola ndaj vetes, qytetarët nuk do t'i harrojnë këto veprime të saj. Kështu, PDK po tregon se nuk është ajo që thirret në interes të vendit, ajo bën vetëm marketing. Ky veprim i saj s’do të harrohet, ajo do të ndëshkohet për këto veprime, sidomos bojkotimin e një seance ku duhet të ishin bashkë për të mirën e vendit”, përmbylli FatonMehmeti për “Bota sot”.
