Kosova në NATO, varet nga fati i Ukrainës/Shantazhi serb pengesa kryesore!

Gjendja e krijuar në Ballkan nga pasiguria e një kërcënimi rus ndaj Ukrainës dhe mundësia për destabilizim të mëtejshëm, në Europën Lindore, dhe në anën tjetër projektet e Serbisë për shkëputjen e Republikës serbe, dhe eventualisht shkëputjen e një pjese të Kosovës, për krijimin e ‘botës serbe’, kanë nxitur studiuesit amerikan të mendojnë se zgjidhja më e mirë për Kosovën është përshpejtimi hyrjes së saj në NATO.

Propozimi është bërë në një raport studimor të kryer nga Shkolla e Studimeve Ndërkombëtare të Avancuara të Universitetit “John Hopkins” dhe Qendrës “Woodroë Wilson”. Në raportin “Nga kriza në konvergjencë – strategjia për luftën kundër jo stabilitetit në Ballkan në burimin e saj”, i kërkojnë Perëndimit që ta përshpejtojë hyrjen e Kosovës në NATO.

“Duke krijuar një rrugë drejt anëtarësimit në NATO për Kosovën, leva që Serbia ka mbi fqinjët e saj dhe mbi SHBA-në dhe BE-në do të zhdukej. Në vend të tij, ekuilibri do t'i lejonte Beogradit dhe Prishtinës të negociojnë zgjidhjen e vetme stabilizuese të mosmarrëveshjes së tyre: njohjen reciproke të bazuar në një Republikë plotësisht sovrane, unitare dhe funksionale të Kosovës, me mbrojtje të plotë për komunitetin serb të Kosovës”, thuhet veç tjerash në raport.

Lidhur me këtë ish-komandanti i UÇK-së, Hafir Hoxha në një prononcim për “Bota sot”, ka deklaruar se shpërbrërja e ish-Jugosllavisë ka mundësuar edhe zgjerimin e NATO-s, me ç’rast Ukraina ende nuk është pjesë e saj, pasi Rusia e kundërshton këtë.

Hafir Hoxha

“Pozita e ish-Jugosllavisë ishte pengesë për zgjerimin e NATO-s në Evropë dhe Ballkan, shpërbërja e ish-YU ngavniti 1991 ka mundësuar zgjerimin e NATO-s në këto pjesë. Pastaj shumë shtete që ishin pjesë e Bashkimit Sovjetik tani më janë anëtare të NATO-s. Ukraina ende nuk është anëtare e NATO-s dhe ka funksionin e tampon zonës mes USA (NATO-s dhe Rusisë, ku ajo kundërshton kategorisht futjen e Ukrainës në NATO, pasi më vonë Rusia do të kontrollohej nga USA dhe asnjë raketë nuk do të mund ta kalonte kufirin e Rusisë pa u zhdukur në ajër mbi sipërfaqen e Rusisë. NATO-ja nuk ia arriti ta bënte anëtare të saj, gjë që tani është problem me e vendos një gjë të tillë pasi Rusia do ta kundërshtonte edhe ushtarakisht”, thotë ai.

Sipas tij, nëse Serbia ende e kundërshton këtë, atëherë SHBA do e fus Kosovën në NATO, madje duke ia bërë me dije Serbinë, se do t’i vite puna që ka me u lut për tu bërë pjesë e NATO-s.

“Një gabim të tillë nuk duhet të lejohet në Ballkan, Serbia po dëshiron me e pas rolin e njëjtë si të Ukrainës që mos të futet në NATO, prandaj USA rregullisht e ka stimuluar Serbinë, duke mos e akuzuar për krimet që bëri në ish-Jugosllavi. Prandaj, ka sekrete për pranimin e një marrëveshje për njohje reciproke, vetëm që Serbia të bëhet pjesë e NATO-s, këtë e ka treguar deri më tani Serbia si ofertë. Por, nëse vazhdon ende në kokëfortësi të kundërshtojë këtë ofertë, atëherë USA do ta shtëngojë rubinetën e përfitimeve dhe previlegjeve për Serbinë, do ta fusë Kosovën në NATO, ta armatos atë dhe t’ia bëjë me dije Serbisë se nëse nuk ke pranuar me të mirë, do ta bie punën që vet ki me më lutë me hy në NATO. Kjo nvaret nga ecuria mes Rusisë dhe Ukrainës, nëse atje bllokohet me embargo dhe forma të tjera Rusia, atëherë e njëjta recetë përfitohet edhe për Serbinë në Ballkan. Kryesorja kapitulli i intervenimit të NATO-s në Ballkan përmbyllet me hyrjen e Serbisë në NATO. Deri atëherë nuk ka qetësi”, thekson Hoxha.

“Antarësimi në NATO do ta ndalonte hegjemoninë serbe”

Analisti Skënder Mulliqi, në një prononcim për “Bota sot”, thekson se orientimi i shqiptarëve është inkuadrim në strukturat e BE-së, gjë që sipas tij është shumë e logjikshme.

Skënder Mulliqi

Mulliqi thekson se integrimi i Kosovës në NATO duhet të jetë një priorirtet i Qeverisë.

“Kosova është ndihmuar në luftë për të fituar pavarësinë nga shtetet mike të Evropës dhe Amerika. Është shumë logjike se orientimi i shqiptarëve është inkuadrimi në strukturat e BE-së, dhe inkuadrimi në NATO. Aleanca ushtarake veriatlantike sa herë që përmendet asocion në lirinë dhe pavarësinë e Kosovës. Pikërisht forcat ushtarake të NATO-s e bombarduan Serbinë gjenocidiale për 78 ditë radhazi, duke i ndjekur forcat kriminale ushtarake serbe nga Kosova. Integrimi në NATO që po përfolet shumë kohën e fundit, duhet të jetë një proritet i kësaj Qeverie. Kosova ka mbetur vendi i vetëm në Evropë që nuk ka lëvizje të lirë në shtetet shengen”, thotë Mulliqi.

Tutje shtoi se ajo që ka ngjallur shpresa që të inkuadrohemi sa më shpejtë në NATO është transformimi i Forcës së Sigurisë në ushtri.

Ndërsa, sipas tij, thelbi për pranimin në NATO, qëndron në faktin se Kosova nuk është njohur nga katër vende që janë anëtare të NATO-s.

“Nuk jemi integruar edhe në shumë organizma të Evropës. Kur bëhet fjalë për NATO-n përpjekjet për marrdhënie kontraktuale me Aleancën për partneritet si ajo e vitit 2012 nuk ka shkuar në favor të Kosovës. Transformimi i Forcës të Sigurisë në Ushtri ka ngjallur shpresat se më shpejtë do të inkuadrohemi në NATO. Vendimi për transformim ishte përkrahuar nga Amerika, por jo edhe sa duhet nga NATO-ja. Thelbi i pranimit apo mos pranimit më të shpejtë të Kosovës në NATO, është se Kosova nuk është pranuar nga katër vendet anëtare të NATO-s. Rruga deri te anëtarësimi i Kosovës në aleancën më të fortë ushtarake në botë nuk është e lehtë të bëhet”, shtoi ai.

Më tej ka propozuar që NATO-ja të hap një perspektivë të antarësimit edhe për Kosovën, me ç’rast edhe rrugëtimi do të ishte më i lehtë.

Sipas tij, Qeveria duhet të ndërmarrë hapa konkret në mënyrë që të jetë partner i ardhshëm i NATO-s.

‘Siç dihet kemi stagnuar me lobim te këto shtete, dhe kjo po e pengon rrugën e integrimit, siç po e pengon edhe mos normalizmi i marrëdhënieve me Serbinë, jo me fajin e Kosovës. Për të qenë ky rrugëtim i yni më i lehtë ishte dashur që NATO-ja të hap një perspektivë të anëtarësimit edhe për Kosovën. Sikur këtë, mosanëtarësim është duke e shrytëzuar Serbia, e cila vazhdimisht gjatë bisedimeve po bënë obstruksione të ndyta politike ndaj Kosovës dhe të ardhmes së saj. Duke u bazuar në të gjitha rrethanat, shtrohet pyetja logjike, se a është e mundshme të gjendet ndonjë alternativë për t’i forcuar marrëdhëniet Kosovë-NATO? Qeveria duhet të angazhohet më shumë duke ndërmarrë hapa konkret që të përgatitet të jetë partner i ardhshëm i NATO-s”, shtoi Mulliqi.

Mulliqi thekson se duhet të angazhohemi dhe të marrim pjesë në aktivitetet e ndryshme, ndërsa ai thotë se antarësimi në NATO do ta ndalonte hegjemoninë serbe, po ashtu edhe tentimin për kthimin e ndikimit politik të humbur të Rusisë në Ballkanin Perëndimor.

“Të angazhohemi që të marrim pjesë në aktivitetet e ndryshme të aleancës. Këtë e ka shprehur edhe presidentja Vjosa Osmani, që edhe Kosova të bëhet pjesë e programit të Partneritetit për Paqen, duke pasur një skemë bashkëpunimi. Anëtarësimi në NATO do ta ndalonte hegjemoninë serbomadhe në rajon, edhe ndaj Kosovës. Do ta ndalonte gjithashtu tentimin e kthimit të ndikimit politik të humbur të Rusisë të Putinit në Ballkanin Perëndimor. Edhe nëse vonohemi në inkuadrim në NATO, në Kosovë ekzistojnë që nga viti 1999 forcat paqeruajtëse të KFOR-it, të cilat mbrojnë kufijtë e vendit”, thotë ai.

Ai thotë se rrugët për antarësimin në NATO do të hapen, atëherë kur politika e jashtme riparohet me diplomat të vyer, madje nga kjo mund të arrijmë edhe ndonjë marrëveshje me Serbinë.

“Politika e jashtme dështuese deri më tani në lobim tek pesë shtetet e BE-së, duhet riparohet me diplomatë të vyer, në menyrë që të bëjnë që këto pesë shtete ta pranojnë Pavarësinë. Atëherë të gjitha rrugët drejt anëtarësimit në NATO do të ishin të hapura. Edhe një marrëveshje finale e njohjes reciproke me Serbinë, por jo sipas planeve të Serbisë është e nevojshme që Kosova të ecë përpara me agjendën e saj të NATO-s. Minoriteti serb që po instrumentalizohet për interesa politike të Beogradit zyrtar duhet tu përshtatet ligjeve dhe Kushtetutës së Kosovës. Ata janë të mbrojtur si çdo qytetar i vendit, dhe se kanë të drejta më shumë se çdo minoritet tjetër në botë”, përfundon Skënder Mulliqi.