Modeli gjermano – francez/ Zbulohet qëllimi i këmbënguljes për ta pranuar Kosova?

Politika

Modeli gjermano – francez/ Zbulohet qëllimi i këmbënguljes për ta pranuar Kosova?

Majlinda Haziri Nga Majlinda Haziri Më 28 nëntor 2022 Në ora: 11:47
Albin Kurti dhe Aleksandër Vuçiq

Nën trysninë ndërkombëtare Kosova do të duhet të negociojë sërish me Serbinë, për të arritur një marrëveshje përfundimtare, e cila besohet se do të çojë në njohje të ndërsjellë.

Vazhdimi i bisedimeve për një marrëveshje të fundit, me ndërmjetësim ndërkombëtar, është konfirmuar javën e kaluar nga autoritetet në Bruksel dhe, bazuar edhe në marrëveshjen për targat, e cila sipas kryeministrit të Kosovës, Kurti, duhej ta përmbante edhe vazhdimin e bisedimeve për çështjet kryesore.

Sipas vetë Kurtit, marrëveshja ishte e parashikuar të arrihej para marsit 2023.

Për shqiptarët është shqetësuese nëse plani i njohur si franko-gjerman, do të ishte i krahasueshëm me paktin gjermano-gjerman, i cili pat çuar më në fund në ribashkimin e dy vendeve.

Shqiptarët, një ribashkim të mundshëm e duan me Shqipërinë, dhe në asnjë mënyrë me Serbinë.

Ky model mbështetet mbi një propozim që ishte bërë para 15 vitesh nga diplomati gjerman Wolfgang Ischinger, i cili e kishte propozuar për zgjidhjen e mosmarrëveshjeve Kosovë-Serbi, modelin e dy Gjermanive. Ishte koha kur në Vjenë mbaheshin bisedimet, që njihen edhe si të Ahtisarit, të cilat pas shumë lëshimeve nga Kosova çuan në Shpalljen e Pavarësisë dhe njohjen ndërkombëtare të saj.

Mirëpo, kryeministri i Kosovës Albin Kurti ka deklaruar se ka një iniciativë franko-gjermane, e cila dëshiron t’i japë më shumë fuqi Miroslav Lajçakut, por sipas tij nuk ka diçka përfundimtare e aq më pak vendimtare.

Por a duhet pranuar një propozim të tillë?

Mehazi: Modeli franko-gjerman ka synim për stërzgjatje të dialogut Kosove-Serbi

Në lidhje me këtë temë në një prononcim për “Bota sot”, ka folur profesori Sulejman Mehazi.

Image
Sulejman Mehazi

Ai u shpreh se është ironike dhe nënçmuese për Kosovën, modeli i dialogut franko-gjerman, që e ka simbolikën politike jo të marrëveshjes, por të stërzgjatjes së qëllimshme të dialogut, në dëm të Kosovës.

“Dialogu i stërzgjatur i dy shteteve fqinje, Kosovë-Serbi në vend që të përfundonte sa më shpejt me njohje reciproke dhe ja doli propozimi absurd e i çuditshëm i dy shteteve të BE-së, Francës dhe Gjermanisë me projektin e papërshtatshëm dhjetëvjeçar të njohjes së dy shteteve Kosovë-Serbi, është ironike dhe nënçmuese për Kosovën modeli i dialogut franko-gjerman, që e ka simbolikën politike jo të marrëveshjes, por të stërzgjatjes së qëllimshme të dialogut në dëm të Kosovës e në dobi të Serbisë. Modeli dhjetëvjeçar i Francës dhe Gjermanisë e ka kuptimin e gjykatës para dy të akuzuarve të cilët qe njëzet vjetë nuk mund të merren vesh dhe gjykatësit e Francës dhe Gjermanisë si për inat të Kosovës, dialogun për njohjen reciproke të dy shteteve e zgjasin dhe për dhjetë vjet të ardhshme që Serbia të përfitonte kohë dhjetëvjeçare për mosnjohjen e Kosovës”, u shpreh ai.

Profesori thotë më tej që modeli dhjetëvjeçar franko-gjerman i dialogut përfundimtar në mes të Kosovës dhe Serbisë është i mirëseardhur për Vuçiqin, është dhuratë serbe në dëm të Kosovës.

Më së shumti ky model franko-gjerman i konvenon Serbisë e kurrsesi Kosovës, nëse Serbia qe njëzet vjet radhazi nuk e njeh pavarësinë e Kosovës dhe ja tani një dhuratë tjetër dhjetëvjeçare franko-gjermane për Vuçiqin e Serbisë për të mos njohur Kosovën. Modeli dhjetëvjeçar franko-gjerman i dialogut përfundimtar në mes Kosovës dhe Serbisë është i mirëseardhur për Vuçiqin, është dhuratë serbe në dëm të Kosovës, pasi dhe tani Serbia e pranon Kosovën, por vetëm që nuk e njeh pavarësinë e saj”, përfundoi Mehazi për “Bota sot”.

Kelmendi: Republika e Kosovës është shtet unitar - dy shkallësh

Ndërsa, profesori Muhamet Kelmendi në një bashkëbisedim me “Bota sot”, thotë që modeli që është përcaktuar nga fuqitë e mëdha nuk dihet nëse mund të funksionojë për Kosovën dhe Serbinë.

Image
Muhamet Kelmendi

Modeli gjerman ka qenë i përcaktuar nga Fuqitë e Mëdha në LDB, përkatësisht nga Anglia, Franca, BRSS dhe SHBA. Tërë Gjermania është e ndarë në katër pjesë. Tri pjesë perëndimore e kanë formuar RFGJ ne vitin 1949 dhe kjo bëhet anëtare e OKB-së. Ndërsa, me marrëveshje, krijohet Gjermania Lindore ( DDR) dhe edhe kjo anëtarësohet në OKB. Të dy këto pjesë i kanë patur të drejtat e barabarta në botë. A është kjo një mënyrë e zgjidhjes së çështjes Kosovë-Serbi, është çështje që varet nga UE nga Anglia, nga SHBA-të”, theksoi profesori.

Gjithashtu ai potencon që Kosova nuk duhet ta pranojë asociacionin, pasi i njëjti e dëmton atë, të tjerat gjëra duhet të bëhen me reciprocitet.

Mundet edhe te ndonjë superfuqie tjetër në botë. Zgjidhja si dy Gjermanitë nuk e pengon Kosovën fare, nëse ruhet karakteri unitar dy-shkallës i pushtetit. Në asnjërën Gjermani nuk ka patur asociacion. Ka patur Republika brenda RFGJ, ndërsa në DDR kemi patur pushtet të SED dhe të diktaturës. Kjo nuk i shkon Kosovës. Kosova ka territor të vogël për organizimin e ndonjë republike. Çështjet minoritare pa reciprocitet nuk mund të zgjidhen. Është pabarazi e madhe, pozita e serbëve në Kosovë me pozitën e shqiptarëve në Serbi. Këtu nuk po flas për Sanxhakun. Parimet mbi të cilat është ndërtuar rendi botëror përcaktojnë reciprocitetin e raporteve bilaterale midis shteteve. Asgjë tjetër nuk duhet pranuar Kosova”, përfundoi Kelmendi për “Bota sot”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat