Asociacioni i komunave serbe në Kosovë po mbetet tema më aktuale në vend.
Vënia e 6 kushteve të kryeministrit Kurti ndaj Serbisë, ka ngjallur reagime të mëdha.
E në lidhje me këtë temë për “Bota sot”, ka folur profesori Sulejman Mehazi.
Ai u shpreh se kryeministri Kurti nuk duhet të dorëzohet karshi Serbisë dhe nuk duhet të lejojë copëtimin e tokave të Kosovës.
“Kryeminsitri Kurti nuk duhet të dorëzohet para askujt me rastin e asociacioneve ekzekutive të pakicës serbe, mos i ndjekni politikanët e mëparshëm shqiptarë që për shkak posteve naive e jo të dinjiteshme copëtuan tokat tona duke iu falë fqinjëve serbëve, grekëve e maqedonasve territore.
"Sikurse udhëheqësit serbë e grekë denbabaden që kanë mbrojtur padrejtësisht shtetet e tyre ndaj okupimeve të tokave shqiptare para ndërkombëtarëve, mbroni dhe ju, i dashur Kurti, Kosovën tuaj drejtësisht para ShBA-së e BE-së. Nëse serbët gjenocidialë e pro-rusë nuk dorëzohen para ShBA-së dhe BE-së dhe ju kurrsesi nuk kenë asfarë arsye të dorëzoheni si proamerikan e proevropian para Vuçiqit rus”, u shpreh ai.
Më tej, profesori përmend marrëveshjen në Maqedoni që u shfrytëzua nga Vuçiq duke shtuar që psikologjia e politikanëve shqiptarë është kompromisi i dhënies së tokave e jo i mbrojtjes së tokave shqiptare.
“Serbët dhe evropianët e Londrës dhe Berlinit me shekuj e njohin mentalitetin inferior të udhëheqesve shqiptarë psikolabilë, të cilët për shkak të posteve të padinjitetshme ndaj shtetit të tyre dorëzohen shpejt, duke iu falë territore fqinjëve. Se psikologjia e politikanëve shqiptarë është kompromisi i dhënies së tokave e jo i mbrojtjes së tokave shqiptare.
Evropianët e dinin se Ali Ahmeti dhe Arbër Xhaferi me Marrëveshjen e Ohrit do t'ua dhuronin Iliridën shqiptare, Maqedoninë, maqedonasve”, shpjegon profesori.
Ndër të tjera, profesori nuk lë pa përmendur edhe “Ballkanin e Hapur”, edhe Çakorrin.
“Presidenti i Serbisë Aleksandar Vuçiqi, e dinte bukur mirë psikologjinë e politikanëve naivë shqiptarë dhe dinakërisht mashtroi politikanët e paditur dhe të shitur të nënshkruajnë, më 2015, asociacionet ekzekutive të pakicës serbe në Kosovë. Jo vetëm kaq, por naivët politikë të Pronto-s krijuan edhe Gjyqin Special të Hagës për t'u burgosur vetë e jo kriminelët serbë. Vuçiqi shkoi dhe më thellë në Shqipëri, ai dhelpërisht krijoi Ballkanin e hapur që t'ia marrë Ramës edhe Shqipërinë. Në anën tjetër Ramush Komandanti për pikë qejfi ia fali Malit të Zi Çakorrin dhe Zhlebin. Historia politike e shqiptarëve tregon se udhëheqësit shtetërorë lehtësish e pa farë rrezistence kanë falur tokat shqiptare, e kurrsesi të mbrojnë territoret tona”, thotë ai.
Lutja e profesorit vazhdon të jetë që kryeminsitri Kurti të mos e bëjë gabimin që liderët e kaluar e kanë bërë.
“- Ahmet Zogu ia fali Italisë Shqipërinë;
-Enver Hoxha fizikisht e territorialisht ia fali Jugosllavisë së Titos, Kosovën e Maqedoninë, kurse mendërisht, politikisht e ideologjikisht ia fali Shqipërinë, Stalinit.
Ju lutemi, mos u dorëzoni para Serbisë, ShBA-së e BE-së i dashur kryeministër i Kosovës, Albin Kurti, ju i keni të gjitha vetitë dhe cilësitë intelektuale, politike, diplomatike e shtetërore për t'u bërë avangardë e politikës shqiptare, mos u dorëzoni se dhe vetë BE-ja e ShBA-ja do ju çmojnë e ndihmojnë si burrështetas, për shkak mbrojtjes dinjitoze të Republikës së Kosovës”, përfundoi Mehazi për “Bota sot”.
