Sot nëpër media kanë qarkulluar lajmet se Aleanca Kosova e Re ka mundësi të dalë nga koalicioni LAA dhe t’i bashkëngjitet koalicionit PAN, ku 4 deputetë të AKR-së mund ta votojnë Ramush Haradinajn për kryeministër.
Të gjitha këto lajme si duken u nxitën nga takimi i anëtarit të AKR-së, Rrahim Pacollit me presidentin Hashim Thaçi, kryetarin e PDK-së, Kadri Veseli dhe kryetarin e Komunës së Skenderajt, Sami Lushtaku.
Mirëpo, këto raportime të mediave i ka mohuar deputeti i AKR-së dhe nënkryetari i kësaj partie, Korab Sejdiu.
Sejdiu përmes një përgjigje telefonike dhënë “Bota sot” ka thënë se asgjë nuk ka të vërtetë këtu.
Ai këto zëra i ka quajtur thashetheme, duke shtuar se vendimet ata do t’i marrin të përbashkëta me partnerët e koalicionit, pra LAA.
“Nuk asgjë të vërtetë rreth këtyre thashemethemeve, ne i qëndrojmë besnik parimit tonë fillestar, pra qëndrimit besnik ndaj partnerëve tanë të koalicionit dhe çdo vendim që merret merret si koalicion”, është shprehur Sejdiu.
Sipas Sejdiut, ata i qëndrojnë besnik koalicionit.
“Unë po e ritheksoj atë që e thashë më herët ne qëndrojmë krahas partnerëve tanë të koalicionit dhe vendimeve do t’i marrim në mënyrë të përbashkët”, ka pohuar Sejdiu për gazetën “Bota sot”.
