Deklarata e zëvendëskryeministrit Enver Hoxhaj se dialogu me Serbinë nuk ka kuptim pa liberalizim të vizave për Kosovën, ka qenë një temë mjaft e diskutuar.
Hoxhaj në vizitën e tij në Strasbourg të Francës, nuk ka hezituar t'ua thotë zyrtarëve të BE-së se dialogu me Serbinë varet vetëm nga liberalizimi i vizave, përcjellë “Bota sot”.
Ai e kishte quajtur të pakuptimtë vazhdimin e dialogut me Serbinë nëse nuk ka heqje të vizave.
I këtij mendimi është edhe njohësi i çështjeve politike në vend. Faik Krasniqi në një prononcim për “Bota sot” thotë se gabimi më i madh i Kosovës ka qenë mos kushtëzimi për shumë çështje, para se të fillonin bisedimet.
Sipas tij, Serbia ka qenë përfituesja më e madhe e dialogut mes dy shteteve.
“Serbia ka qenë përfituesja më e madhe e dialogut Kosovë-Serbi, kurse qytetarët e Kosovës vazhdojnë akoma të ngelin të izoluar nga BE-ja. Gabimi më i madh i Kosovës ka qenë mos kushtëzimi për shumë çështje, para se të fillonin bisedimet me Serbinë”, ka thënë ai.
Krasniqi thotë se Kosova vazhdimin e dialogut me Serbinë mund ta kushtëzojë me liberalizim të vizave.
“Sidoqoftë, Kosova vazhdimin e dialogut me Serbinë mund ta kushtëzojë me liberalizim të vizave, në të kundërtën s'ka pse të vazhdoje ky dialog”, ka përfunduar Faik Krasniqi për “Bota sot”.