Publicisti Faton Abdullahu në një prononcim për “Bota sot” thotë se presidenti i Kosovës, Hashim Thaçi është duke bërë lojëra politike për përfitime të tij personale.
“Me rëndësi është të mbetesh në lojën politike dhe më e rëndësishme se kaq është, të mbetesh akteri kryesor i kësaj loje. Nuk është i rëndësishëm rezultati, por loja. Kjo është moto e Thaçit në politikë tash sa kohë. Këtë ai po e bënë mirë për vete, për klanin e tij dhe për ata që përfitojnë nga ai, por jo për qytetarin e Kosovës dhe të ardhmen e Kosovës.
Sipas tij, kjo lojë e tij duhet të ndalet.
“Lëshimi i ‘balonave testues’ nga Presidenti aktual tashmë është bërë pjesë e politikës së tij që kamuflohet, herë me patriotizëm e herë me pro-uesternizëm, për tu kuptuar drejtë vetëm atëherë kur e keqja është bërë. Presidenti Thaçi po e bën këtë edhe me planin e ndarjes së Kosovës”.
“Tani ne, ngjashëm me frikën e deleve të pambrojtura nga ujku, duhet të presim se çfarë po na servon ai, e çfarë jo, rreth kësaj. E frikshme. Opozita duhet të reagoj shpejt që kjo të ndalet. Përvoja e deritashme është e mjaftueshme për të kuptuar se po përgatiten hile të mëdha. Shpresë e vetme është reagimi i opozitës. E keqja shtesë është se, ajo nuk është unike”, shtoi ai.