Profesori universitar, Muhamet Kelmendi në një prononcim për “Bota sot”, thotë se Kosova nuk duhet të hyjë në bisedimet finale me Serbinë pa një platformë të qartë, që i përcakton disa kushte.
Në mesin e këtyre kushteve, sipas tij, duhet të jetë pagimi i dëmeve të luftës, dënimi i kriminelëve dhe përdhunimet e femrave shqiptare.
“Kosova nuk duhet të hyjë fare në bisedime, pa bisedime për gjetjen e modaliteteve për pagimin e dëmeve të luftës, pa i marrë Serbia përgjegjësitë penale për krimet e luftës, përgjegjësi për përdhunimet e 20 mijë femrave shqiptare”, thotë Kelmendi për “Bota sot”.
Ai më tej përmend edhe disa kushte tjera para se të fillohen bisedimet finale.
“Nuk duhet të nisin bisedimet pa pranimin e Serbisë që të negociohet edhe për të drejtat e shqiptarëve ne Luginën e Preshevës, dorëzimin e dokumentacionit të grabitur nga kriminelët e shtetit serb dhe mos pengimin e Kosovës në anëtarësimin në organizata ndërkombëtare”, deklaroi më tej ai.
“Pa marrjen e përgjegjësisë nga ana e shteti serb për dhunë dhe terror, për gjenocid, çdo marrëveshje me shtetin serb, është thjesht shkatërrim i Republikës”.
Kelmendi shtoi se presidenti nuk është një person adekuat për bisedimet me Serbinë.
Ndryshe, presidenti Hashim Thaçi në ligjëratën e tij në Universitetin e Oxfordit është shprehur se Kosova është e gatshme për bisedime me Serbinë dhe për kompromise.